भ्याक्सिन लगाएकाको ‘गलत एचआईभी पोजेटिभ’ रिपोर्ट आएपछि अष्ट्रेलियाबाट भ्याक्सिन निर्माण खारेज
अष्ट्रेलियामा परीक्षणका क्रममा रहेको भ्याक्सिनमा एचआईभीमा पाइने प्रोटिनको अंश प्रयोग गरिएका कारण सहभागीहरुमा गलत ढंगले एचआईभी रिपोर्ट पोजेटिभ आएपछि सरकारले भ्याक्सिन कार्यक्रम नै खारेज गरेको छ । भ्याक्सिनमा प्रयोग गरिएको उक्त प्रोटिनको अंशका कारण एचआईभी परीक्षणका क्रममा देखिने एन्टीबडी ट्रिगर भएको जनाइएको छ ।
तर गलत एचआईभी पोजेटिभ देखिएपनि उनीहरुमा भने वास्तविक रुपमा भने एचआईभी नरहेको जनाइएको छ । यद्यपी ७५० मिलियनको परीक्षण कार्यक्रम सरकारले रद्द गरिदिएको छ । कोरोना भाइरसको भ्याक्सिन कार्यक्रम रद्द गर्ने अष्ट्रेलिया पहिलो देश हो ।
युनिभर्सिटी अफ क्वीन्सल्याण्ड र अष्ट्रेलियन बायोटेक फर्म सीएसएलले भ्याक्सिनको परीक्षण गरिरहेका थिए । यो भ्याक्सिनका लागि अष्ट्रेलियाको सरकारले सहायता उपलब्ध गराएको थियो । शुक्रबार आयोजित पत्रकार सम्मेलनमा प्रधानमन्त्री स्कट मोरिसनले परियोजना खारेज गरिएको घोषणा गरेका छन् ।
विश्वासमा कुनै प्रश्नचिन्ह खडा हुन नहुने भएकाले परियोजना खारेज गरिएको उनले बताए । अष्ट्रेलियन जनताको संरक्षणका लागि यस्तो निर्णय गरिएको उनले बताए । सरकारले देशभित्रको परियोजना खारेज गरेपनि फाइजरका १२० मिलियन अतिरिक्त डोज, आष्ट्राजेनेकाका अतिरिक्त २० मिलियन डोज र नोभाभ्याक्सका अतिरिक्त ११ मिलियन डोज अर्डर गर्ने भएको छ ।
परीक्षणमा रहेको भ्याक्सिनले एचआईभी परीक्षणको गलत रिपोर्ट आउनेगरी एन्टीबडी उत्पादन गरेको स्वास्थ्यमन्त्री ग्रेग हन्टले बताएका छन् । गलत एचआईभी पोजेटिभ रिपोर्टका आएपनि भ्याक्सिनले भने कोरोनबिरुद्ध लड्न प्रभावकारी रुपमा काम गरेको संकेत आएको युनिभर्सिटी अफ क्वीन्सल्याण्डले जनाएको छ ।
तर अब भ्याक्सिन उत्पादन कम्पनीले दोश्रो र तेश्रो चरणको परीक्षण नगर्ने भएको छ । भ्याक्सिनका कारण एचआईभी संक्रमण हुने कुनै कारण नरहेको र फ्लोअप परीक्षण गर्दा परीक्षण सहभागीहरुमा एचआईभी भाइरस रहेको नपाइएको युनिभर्सिटीले जनाएको छ ।
