हङकङमा नेपालीले चलाएको रेष्टुरेन्टमा आगलागी हुँदा ८ जनाको मृत्यु, एनआरएनए अध्यक्षबाट श्रद्धाञ्जली


प्रकाशित मिति : मंसिर १, २०७७ सोमबार

हङकङमा नेपालीले सञ्चालन गरेको एक रेष्टुरेन्टमा आगलागी हुँदा मृतक नेपालीको संख्या ८ पुगेको छ । याउमातेइस्थित रेष्टुरेन्टमा भएको आगलागीमा एक बच्चासहित चार पुरुष र तीन महिलाको सनाखत नभएको जनाइएको छ ।

हङकङको समय अनुसार आइतबार राती करिब ८ बजे भएको आगलागीमा परी अरु ११ जना घाइते भएका छन् । आगलागीमा पर्नेहरु ८ बर्षदेखि ४८ बर्षसम्मका छन् ।

घटनास्थल याउमातेइको क्यान्टोन रोड र साइगोन रोडको बीचमा पर्छ, जुन हङकङका नेपाली बसोबास गर्ने एउटा मुख्य क्षेत्र हो ।

हङकङमा यो पछिल्लो एक दशकयता भएको सबैभन्दा डरलाग्दो आगलागी भएको प्रहरीले जनाएको छ। आगलागीबाट जोगिन एक जना पुरुष राती करिब ८ बजेर ३५ मिनेटमा झ्यालबाट भाग्दै गरेको देखिएको थिए।

अग्नि नियन्त्रक सुरक्षाकर्मीले करिब आधा घण्टामा आगो नियन्त्रणमा लिएका थिए । घाइतेलाई नजिकैको क्वीन एलिजावेथ, क्वांग वाह, प्रिन्सेस मार्गरेट अस्पताल र क्यारितास मेडिकल सेन्टर लगिएको छ।

बर्थ डे पार्टी भइरहेको बेला आगलागी भएको जनाइएको छ ।

एनआरएनए अध्यक्षबाट श्रद्धाञ्जली

यसैबीच एनआरएनए अध्यक्ष कुमार पन्तले आठजना नेपालीको दुःखद निधन भएको समाचारले मर्माहत बनाएको भन्दै दुःखद घडीमा मृतकहरुमा हार्दिक श्रद्धाञ्जली व्यक्त गर्दै शोक सन्तप्त परिवारप्रति हार्दिक समवेदना प्रकट गर्नुभएको छ । साथै घाइतेहरुको शीघ्र स्वास्थ्य लाभको कामना गर्नुभएको छ ।

एनआरएनए अध्यक्ष कुमार पन्त

घटनामा गैरआवासीय नेपाली संघले उद्धार, राहत र दुवैतर्फका सरकारसँग संयोजनको पहल गरिरहेको उहाँको भनाइ छ । संघको राष्ट्रिय समन्वय परिषद, हङकङका अध्यक्ष टीका गुरुङ अहिले घाइतेहरु रहेको अस्पतालमा रहेको जनाइएको छ ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com