पेन्सिलभेनियामा भोट अन्तर एकलाखभन्दा कम
प्रकाशित मिति : कार्तिक २०, २०७७ बिहीबार
पेन्सिलभेनियामा जो बाइडेन र डोनाल्ड ट्रम्पबीचको भोटको अन्तर एकलाख भन्दा कममा झरेको छ । बाइडेनले ३१ लाख ४२ हजार मत प्राप्त गरेका छन् भने ट्रम्पले ३२ लाख ४० हजार मत प्राप्त गरेका छन् । पेन्सिलभेनियामा झण्डै ५ लाख मतहरु गणना गर्न बाँकी रहेको छ ।
अहिलेसम्म पेन्सिलभेनियामा ट्रम्पले अग्रता कायम गरेपनि हिजोदेखि आजसम्म मतको अन्तरमा उल्लेख्य कमी आएको छ । आज रातीसम्म पेन्सिलभेनियामा को विजयी हुन्छ भन्ने परिदृश्य स्पष्ट हुने अनुमान गरिएको छ ।
नर्थ क्यारोलिना र जर्जियामा पनि ट्रम्पको अग्रता कायमै रहेको छ । जर्जियामा ट्रम्प झण्डै १३ हजार मतले अगाडि छन् । जर्जियामा पनि मतको अन्तर कम हुँदै गइरहेको छ । नेभाडामा भने बाइडेन अगाडि छन् । त्यहाँ बाइडेन १२ हजार मतले अगाडि रहेका छन् ।
अहिलेसम्मको अवस्था हेर्दा अमेरिकाभर बाइडेनका पक्षमा २६४ इलेक्टोरल कलेज मत र ट्रम्पका पक्षमा २१४ इलेक्टोरल कलेज मत देखिएको छ । अहिलेकै अग्रता कायम रहेको खण्डमा जो बाइडेनले राष्ट्रपति चुनाव जित्नेछन् । राष्ट्रपति चुनाव जित्नका लागि २७० इलेक्टोरल मतको आवश्यकता छ ।