जर्जियामा साढे १३ हजार भोटको मात्र अन्तर, ५० हजार भोट गणना गर्न बाँकी
प्रकाशित मिति : कार्तिक २०, २०७७ बिहीबार
जर्जियामा जो बाइडेन र डोनाल्ड ट्रम्पबीच जम्मा साढे १३ हजार मतको अन्तर कायम भएको छ । ठ्याक्कै भन्दा १३ हजार ५ सय ३४ मतको अन्तर रहेको छ । प्रतिशतमा हेर्दा मत अन्तर जम्मा शुन्य दशमलव २ प्रतिशतमात्र रहेको छ । फुल्टन काउन्टीको मतगणना समाप्त भएपनि राज्यभर झण्डै ५० हजार मतगणना गर्न बाँकी रहेको जनाइएको छ ।
गणना गर्न बाँकी रहेका मतले अन्तिम परिणाम बदल्न सक्ने अझै सम्भावना रहेकाले परिणाम अनुमान गर्न अझै कठिन रहेको छ । अहिलेसम्म बाइडेनले २४ लाख २२ हजार र ट्रम्पले २४ लाख ३६ हजार मत प्राप्त गरेका छन् ।
विगतमा रिपब्लिकनको पकड क्षेत्र रहेको जर्जिया अहिले ब्याटलग्राउण्ड राज्यका रुपमा उदय भएको हो । जर्जियाबाट कुल १६ इलेक्टोरल मत प्राप्त हुन्छ ।
यसैबीच ६ वटा इलेक्टोरल मत रहेको नेभाडाको थप मत परिणाम आएको छ । पछिल्लो परिणाम अनुशार जो बाइडेनले ६ लाख ४ हजार २ सय ५१ मत प्राप्त गरेका छन् भने डोनाल्ड ट्रम्पले ५ लाख ९२ हजार ८ सय १३ मत प्राप्त गरेका छन् । यसअगाडिसम्म ८ हजारमतलेमात्र बाइडेन अगाडि रहेकोमा अब झण्डै १२ हजारको मतान्तर कायम भएको छ ।
बाइडेनले नेभाडा जितेमा अमेरकी राष्ट्रपति बन्नका लागि आवश्यक २७० इलेक्टोरल कलेज मत प्राप्त हुनेछ । नेभाडामा हारेको खण्डमा राष्ट्रपतिमा निर्वाचित हुनका लागि जर्जिया, नर्थ क्यारोलिना वा पेन्सिलभेनियामध्ये एउटा राज्यमा जीत हासिल गर्नुपर्नेछ । नेभाडाको परिणाम पनि निर्णायक बन्न सक्ने भएकाले अहिले नेभाडाले धेरैको ध्यानाकर्षण गरेको छ । २०१६ को चुनावमा नेभाडामा हिलारी क्लीन्टनले जीतेकी थिइन् ।