नेभाडा लगायतका राज्यको बाँकी नतिजा अब बिहिबार विहान
प्रकाशित मिति : कार्तिक २०, २०७७ बिहीबार
अमेरिकी राष्ट्रपति चुनावमा नेभाडाको मत परिणामको पनि धेरैले अपेक्षा गरेका छन् । ६ वटा इलेक्टोरल मत रहेको नेभाडामा जो बाइडेनले जीतेमा ह्वाइट हाउस प्रवेशका लागि बाटो खुल्ने देखिएको छ । तर नेभाडाको बाँकी मत परिणाम बिहिबार विहानमात्र आउने भएको छ ।
सेक्रेटरी अफ स्टेटको चुनाव विभागले अब अर्को अपडेट बिहिबार विहानमात्र दिने बताएको हो । बुधबार बेलुकासम्म ७५ प्रतिशत मत गणना भइसकेको नेभाडामा बाइडेनले अग्रता कायम गरिरहेका छन् । २०१६ को चुनावमा नेभाडामा हिलारी क्लीन्टनले जीतेकी थिइन् ।
नेभाडामा व्यक्ति उपस्थीत भएर गरिएका अग्रिम मतदानका सबै मत गणना भइसकेका छन् । त्यस्तै चुनावको दिन हालिएका मत पनि गणना भइसकेका छन् । नोभेम्बर २ सम्म हुलाकबाट प्राप्त मतहरु पनि गणना भइसकेको जनाइएको छ ।
नोभेम्बर ३ मा र त्यसपछि हुलाकबाट प्राप्त मतपत्रहरु भने गणना गर्न बाँकी रहेका छन् । नेभाडामा झण्डै ६ लाखले हुलाकमार्फत मतपत्र पठाएर मतदान गरेका छन् ।
नर्थ क्यारोलिनाको पनि पूर्ण नतिजा आउन समय लाग्नेछ । नर्थ क्यारोलिनामा नोभेम्बर १२ सम्म हुलाकबाट प्राप्त मतपत्रहरु गणना गर्न सकिनेछ । ती मतपत्रहरुमा नोभेम्बर ३ वा त्यो भन्दा अगाडिको पोष्टमार्क हुनुपर्नेछ । तर झण्डै ९४ प्रतिशत मतगणना भइसकेको छ । अहिलेसम्म ट्रम्पले अग्रता कायम गरिरहेका छन् । नर्थ क्यारोलिनाबाट १५ इलेक्टोरल मत प्राप्त हुन्छ ।
पेन्सिलभेनियामा ८९ प्रतिशत मत गणना गरिएको छ । त्यसपछिको परिणाम सार्वजनिक गरिएको छैन । थप परिणाम आगामी घण्टाहरुमा आउने अपेक्षा गरिएको छ । पेन्सिलभेनियामा शुक्रबारसम्म हुलाकबाट आएका मतपत्रहरु गणना गरिनेछ । त्यसैले शतप्रतिशत मत गणनाका लागि शुक्रबारसम्म कुर्नुपर्नेछ ।
जर्जियामा मतगणना लगभग समाप्त हुन लागेको छ । अहिलेसम्म जर्जियामा झण्डै ९० हजारमात्र मतगणना गर्न बाँकी रहेको छ । अहिलेसम्म ९८ प्रतिशत मतगणना भइसकेको छ ।
अहिलेसम्मको मतपरिणाम अनुशार जर्जियामा डोनाल्ड ट्रम्पले ३३ हजार मतले अग्रता कायम गरिरहेका छन् । अर्थात् शुन्य दशमलव ६ प्रतिशतले बाइडेनभन्दा ट्रम्प अगाडि रहेका छन् ।
अहिलेसम्म जर्जियामा जो बाइडेनले २३ लाख ९५ हजारभन्दा धेरै मत ल्याएका छन् । डोनाल्ड ट्रम्पले २४ लाख २७ हजार भन्दा धेरै मत ल्याएका छन् ।