आज अमेरिकामा चुनावको मुख्य दिन, राष्ट्रपति सहित सिनेटका ३५ र हाउसका सबै सिटमा मतदान
प्रकाशित मिति : कार्तिक १८, २०७७ मंगलबार
आज अमेरिकामा राष्ट्रपति चुनावको मुख्य दिन हो । आजको दिनमा मात्र ६० मिलियन भन्दा धेरैले मतदान गर्ने अपेक्षा गरिएको छ ।
चुनावको मुख्य दिनमा अमेरिकनहरु निकै उत्साहित भएर मतदानमा निस्किएका छन् । यसपटक अमेरिकामा यो शताब्दीकै धेरै प्रतिशतले मतदान गर्ने अनुमान गरिएको छ ।
राष्ट्रपति चुनावमा सबैको मुख्य ध्यान ब्याटलग्राउण्ड राज्यहरु फ्लोरिडा र पेन्सिलभेनिया लगायततिर केन्द्रीत रहेको छ ।
एरिजोना, फ्लोरिडा, मिसिगन, नर्थ क्यारोलिना, पेन्सिलभेनिया र विसकन्सिनले सबैको ध्यानाकर्षण गरिरहेका छन् । यी सबै राज्यमा सन् २०१६ को चुनावमा डोनाल्ड ट्रम्पले जितेका थिए ।
एरिजोनाबाट ११ , फ्लोरिडाबाट २९ , मिसिगनबाट १६ , नर्थ क्यारोलिनाबाट १५, पेन्सिलभेनियाबाट २० र विसकन्सिनबाट १० इलेक्टोरल मत प्राप्त हुन्छ । अमेरिकामा राष्ट्रपति पदमा जित्न कम्तीमा २७० इलेक्टोरल मतको आवश्यकता पर्छ ।
यसपटकको चुनावमा नेपाली अमेरिकनहरु पनि निकै उत्साहतका साथ सहभागी भइरहेका छन् ।
यसपटकको चुनावमा झण्डै ५० हजार नेपाली अमेरिकनहरु मतदानका लागि योग्य रहेका छन् । त्यो बाहेक नेपाली अमेरिकन बाबुआमाबाट अमेरिकामा जन्मिएर मतदानका लागि योग्य भएकाहरुको संख्या पनि बढ्दो छ ।
अहिलेसम्म अमेरिकी नागरिकता लिने नेपालीको संख्या झण्डै ५० हजार पुगेको अमेरिकी सरकारको डिपार्टमेन्ट अफ होमल्याण्ड सेक्युरिटीले जनाएको छ ।
सन् २०२४ मा हुने चुनावसम्म यो संख्या तीनगुणा बढ्ने अनुमान गरिएको छ । किनभने हाल अमेरिकामा रहेका झण्डै एकलाख ग्रिनकार्डवाहक नेपालीहरु त्यतीबेलासम्म अमेरिकी नागरिकता प्राप्त गर्नका लागि योग्य हुनसक्नेछन् ।
आजको चुनावमा अमेरिकाको प्रतिनिधिसभाका सबै ४३५ सिटमा मतदान भइरहेको छ । साथै सिनेटका १ सय मध्य ३५ सिटमा मतदान भइरहेको छ । अहिलेको सिनेटमा रिपब्लिकनको र हाउसमा डेमोक्र्याट्सको नियन्त्रण कायम रहेको अवस्थामा आजको चुनावको यो परिदृश्यलाई समेत फेर्न सक्छ ।