भोट हालेका मतपत्र सहितको फोटो सार्वजनिक गर्नु कैयन राज्यमा गैरकानुनी, इलिनोयमा कैद र जरिवानाको कडा कानुन
प्रकाशित मिति : कार्तिक १५, २०७७ शनिबार
अमेरिकी राष्ट्रपतिको चुनावको मुख्य दिन नोभेम्बर ३ आउनु अगाडि कैयनले अग्रिम मतदान र हुलाकमार्फत मतपत्र पठाएर मतदान गरिरहेका छन् । यसरी मतदान गर्दा कतिपयले मतपत्रसहितका फोटोहरु पनि सामाजिक सञ्जालमा पोष्ट गरेका हुनसक्छन् । तर कैयन राज्यमा चिन्हो लगाएका वा मत हालेका मतपत्रको फोटो लिनु र सामाजिक सञ्जालमा हाल्नु गैरकानुनी हो ।
कतिपय राज्यहरुले भने चिन्हो लगाएका वा मत हालेका मतपत्रको फोटो लिनु र सामाजिक सञ्जालमा प्रतिबन्ध लगाउँदैनन् । तर कैयन राज्यले मत किनबेच र घुसलाई निरुत्साहित गर्न चिन्हो लगाएका वा मत हालेका मतपत्रको फोटो लिन र सार्वजनिक गर्नमा प्रतिबन्ध लगाएको छ । पछिल्लो चरणमा क्यालिफोर्निया, कोलोराडो, हवाई, नेब्रास्का, ओरेगन र युटाहमा चिन्हो लगाएका वा मतहालेका मतपत्रहरुको फोटो खिचेर सामाजिक सञ्जालमा हाल्नमा कुनै रोक नलगाउने कानुन ल्याएका थिए । तर अरु कैयन राज्यहरुले भने मतहालेका मतपत्रको फोटो खिच्न निषेध गर्ने कानुनहरु पारित गरेका छन् ।
२०१६ को चुनावमा जस्टिन टिम्बरलेकले मतहालेको मतपत्रसहितको फोटो सामाजिक सञ्जालमा हालेकोमा यो टेनेसीको कानुनबिरुद्ध रहेको थाहा पाएपछि डिलिट गरेका थिए । अमेरिकामा कम्तीमा १४ राज्यमा मतहालेका मतपत्रसहितको फोटो खिच्न र सामाजिक सञ्जालमा हाल्न कडा प्रतिबन्ध रहेको छ ।
अलाबामा, अर्कान्सास, क्यालिफोर्निया, कोलोराडो, कनेक्टिकट, वासिंटन डिसी, हवाई, आयोवा, कन्सास, केन्टकी, लुजियाना, मिशिगन, मोन्टाना, नेब्रास्का, न्यु ह्याम्पशायर, न्यु मेक्सिको, नर्थ डाकोटा, ओक्लाहोमा, ओरेगन, रोड आइल्याण्ड, युटाह, भर्मोन्ट, भर्जिनिया, वासिंटन, वायोमिंगमा मतहालेका मतपत्रसहितको सेल्फी खिच्न र सार्वजनिक गर्नमा कुनै रोक छैन ।
तर फ्लोरिडा, जर्जिया, इलिनोय, मासाचुसेट्स, मिजौरी, नेभाडा, न्युयोर्क, नर्थ क्यारोलिना, ओहायो, साउथ क्यारोलिना, साउथ डाकोटा, टेनेसी, टेक्सास, वेष्ट भर्जिनियामा मतहालेका मतपत्रसहितको फोटो खिच्न र सामाजिक सञ्जालमा हाल्नु गैरकानुनी हो । इलिनोयमा यसरी मतहालेका मतपत्रसहितको फोटो सार्वजनिक गर्नु चौथो श्रेणीको फेलोनी हो । यस्तो गर्ने व्यक्तिलाई एकदेखि ३ बर्ष कैदसजाय र अधिकतम २५ हजार डलरसम्म जरिवाना हुनसक्छ ।
मासाचुसेट्समा मतपत्रसहितको फोटो सार्वजनिक गर्नेलाई अधिकतम ६ महिना जेल र एकसय डलरसम्म जरिवानाको व्यवस्था छ । मिजौरीमा पनि मतपत्रसहितको फोटो सार्वजनिक गर्नु चौथो श्रेणीको चुनावी अपराध हो ।
अलास्का, एरिजोना, डेलावर, आइदाओ, इन्डियाना, मेन, मेरिल्याण्ड, मिनिसोटा, मिसिसिपी, न्युजर्सी, पेन्सिलभेनिया, विसकन्सिन लगायतका राज्यमा भने स्पष्ट कानुन छैन । तर पनि यी राज्यहरुमा समेत मतदानस्थलमा मतदान गरेका मतपत्रसहितको सेल्फी लिन र सामाजिक सञ्जालमा हाल्न निरुत्साहित गरिएको छ ।