राष्ट्रपति उम्मेदवार जो बाइडेनले गरे मतदान, अग्रिम मतदान गर्नेहरु अहिलेसम्म झण्डै साढे ७ करोड
प्रकाशित मिति : कार्तिक १२, २०७७ बुधबार
राष्ट्रपति उम्मेदवार जो बाइडेनले आज डेलावरमा मतदान गरेका छन् । जो बाइडेन र पत्नी जिल बाइडेनलले आफ्नो गृहक्षेत्रमा अग्रिम मतदान (अर्लि भोटिङ) गरेका हुन् ।
अमेरिकामा अहिलेसम्म ७५ मिलियन भन्दा बढीले हुलाक र मतदान स्थलमा गएर अर्लि भोटिङ गरिसकेका छन् । मतदान पछि बाइडेनले पत्रकारसँग कुराकानी गर्दै हेल्थ केयरबारे आफ्नो योजना बताएका छन् ।
अर्का उम्मेदवार डोनाल्ड ट्रम्पले गत शनिबार नै फ्लोरिडामा मतदान गरेका हुन् । मतदानपछि उनले आफूले ट्रम्प नाम गरेको व्यक्तिलाई मत दिएको बताएका थिए ।
अमेरिकामा अहिलेसम्म ७५ मिलियनले मतदान गरिसकेका छन् । जसमध्ये झण्डै साढे २५ मिलियनले अर्लि भोटिङ गरेका छन् भने साढे ४९ मिलियनले हुलाकमार्फत मतपत्र पठाएर मतदान गरेका छन् ।
क्यालिफोर्नियामा ७९ लाखले मतदान गरिसकेका छन् भने टेक्सासमा ८१ लाखले मतदान गरिसकेका छन् । ब्याटग्राउण्ड राज्य फ्लोरिडामा पनि ६९ लाखले मतदान गरिसकेका छन् ।
अमेरिकी राष्ट्रपति चुनावको मुख्य दिन भने नोभेम्बर ३ हो । कोरोनाको महामारीका कारण यसपटक धेरैले हुलाकमार्फत मतदान गरेका कारण परिणाम आउन लामो समय लाग्ने अनुमान गरिएको छ ।