अमेरिका: ओपीटी वर्क परमिटको दुरुपयोग गर्ने ११ भारतीयसहित १५ विद्यार्थी पक्राउ
प्रकाशित मिति : कार्तिक ५, २०७७ बुधबार
अमेरिकामा विद्यार्थी भिसामा आएर ओपीटी वर्क परमिटको दुरुपयोग गर्ने ११ भारतीयसहित १५ अन्तर्राष्ट्रिय विद्यार्थीहरुलाई पक्राउ गरिएको इमिग्रेशन एण्ड कस्टम इन्फोर्समेन्ट आइसले जनाएको छ । ओपीटीमा जालसाजी रोक्न आइस र होमल्याण्ड सेक्युरिटीले संचालन गरेको अपरेशन अप्टीकल इलुजन अन्तरगत उनीहरुलाई पक्राउ गरिएको हो ।
उनीहरुलाई मासाचुसेट्स, वासिंटन डिसी, टेक्सास, फ्लोरिडा, न्युजर्सी, पेन्सिलभेनिया र टेनेसीबाट पक्राउ गरिएको हो । पक्राउ पर्नेमा ११ जना भारतीय, २ जना लिबियन, एकजना सेनेगल र एकजना बंगालादेशका विद्यार्थी रहेका छन् । उनीहरुले हुँदै नभएको कम्पनीमा काम गरेको झुठो दावी गरेको जनाइएको छ ।
यसैबीच अमेरिकी सरकारको डिपार्टमेन्ट अफ होमल्याण्ड सेक्युरिटीले ११ सयभन्दा धेरै अन्तर्राष्ट्रिय विद्यार्थीहरुको ओपीटी कार्यक्रम अन्तरगतको वर्क परमिट खारेज गर्ने भएको छ । उनीहरुको वर्क परमिट या त खारेज गरिने छ या त नविकरण गरिनेछैन ।
ओपीटी कार्यक्रममाथिको कारवाही स्वरुप यो कदम चालिएको होमल्याण्ड सेक्युरिटीले बुधबार जनाएको छ । यो सातामात्र युएससीआईएसले ७ सय जना ओपीटी प्राप्तकर्ताहरुलाई पत्र पठाएर उनीहरुको वर्क परमिट खारेज गर्ने जनाएको छ ।
अरु ४ सय अन्तर्राष्ट्रिय विद्यार्थीहरुको ओपीटी अन्तरगतको वर्क परमिट नविरकण नगरिने जनाइएको छ । ओपीटी अन्तरगतको वर्क परमिटले अन्तर्राष्ट्रिय विद्यार्थीहरुलाई अमेरिकामा विद्यार्थी भिसामा रहँदा आफ्नो अध्ययनको क्षेत्रमा अस्थायी रुपमा काम गर्न अनुमति प्रदान गर्छ ।
अहिले अमेरिकामा २ लाख २० हजार भन्दा धेरै अन्तर्राष्ट्रिय विद्यार्थीहरु ओपीटी कार्यक्रममा रहेका छन् । तर होमल्याण्ड सेक्युरिटीले ११ सय जालसाजीमा संलग्न भएको निष्कर्ष निकालेको छ । उनीहरुले आफ्नो पढाईको क्षेत्रबाहेक अन्य काम गरेको जनाइएको छ । गत जनवरीदेखि ओपीटी कार्यक्रमको नियम उल्लंघन गर्ने विद्यार्थीहरुमाथि अनुसन्धान र छानविन सुरु गरिएको थियो ।