कैयन अमेरिकी भिसा आवेदकले यात्रा, रोजगार र आवासको १५ बर्षको इतिहास बुझाउनुपर्ने नियम ल्याईदै
प्रकाशित मिति : कार्तिक ५, २०७७ बुधबार
अमेरिकी सरकरको विदेश मन्त्रालयले कैयन अमेरिकी भिसा आवेदकले १५ बर्षको इतिहास बुझाउनुपर्ने नियम ल्याउने तयारी गरेकोछ छ । त्यसका लागि व्यवस्थापन र बजेट अफिसको स्वीकृतिका लागि आज फेडरल रजिस्टरमा सुचना प्रकाशित गरिएको छ ।
यो सुचनामा ६० दिनको कमेन्ट अवधि राखिएको छ । यसबारे प्रतिकृया जनाउन चाहनेहरुले डिसेम्बर २१ सम्म जनाइसक्नुपर्नेछ । त्यसपछि अन्तिम नियम प्रकाशित गरिनेछ ।
अमेरिकाको गैर आप्रवासी वा आप्रवासी भिसाका लागि डीएस १६० वा २६० आवेदन दिएका आवेदकले अतिरिक्त विवरण बुझाउनुपर्ने भएमा डीएस ५५३५ भरेर बुझाउनुपर्नेछ ।
डीएस ५५३५ हेर्न यहाँ क्लीक गर्नुहोला ।
उक्त आवेदनमा १५ बर्षको यात्राको इतिहास र उक्त यात्राका लागि उपलब्ध फण्डबारे पनि विवरण खुलाउनुपर्नेछ । कुनै देशभित्रैको आतंकवादी नियन्त्रित क्षेत्रमा भ्रमण गरेको भएमा त्यसको विवरण पनि खुलाउनुपर्नेछ ।
त्यस्तै १५ बर्षको रोजगारको इतिहास र आवासीय इतिहास पनि खुलाउनुपर्नेछ ।
आफ्ना सबै पासपोर्ट नम्बरहरु, दाजुभाई दिदीबहिनीका नाम र जन्ममितिहरु, सबै छोराछोरीका नाम र जन्ममितिहरु, सबै दम्पत्ति वा पूर्व दम्पत्तिहरुका नाम र जन्ममितिहरु समेत उल्लेख गर्नुपर्नेछ ।
विगतमा डीएस ५५३५ फर्म भर्दा विगत ५ बर्षमा प्रयोग भएका सामाजिक सञ्जालहरुको विवरण, फोन नम्बर र ठेगानाहरु बुझाउनुपर्ने थियो । तर अब उक्त विवरणहरु डिएस १६० भिसा फर्ममा नै बुझाउनुपर्ने भएकाले उक्त विवरण डीएस ५५३५ फर्म भर्दा बुझाउनु पर्दैन ।
कुनै आवेदकको बारेमा थप जाँचबुझ गर्नुपरेमा मात्र डीएस ५५३५ फर्म भर्न लगाइने छ । सबै नियमित आवेदकहरुले भने यो फर्म भर्नु पर्दैन । थप प्रश्नहरु भएमा भिसा अधिकारीले अन्तरवार्ताका बेलामा समेत सोध्न सक्नेछन् ।