आइसको अनुरोधमा बढी समय जेलमा राखिएकाहरुलाई १४ मिलियन डलर क्षतिपूर्ति दिइने
प्रकाशित मिति : आश्विन २७, २०७७ मंगलबार
इमिग्रेशन एण्ड कस्टम इन्फोर्समेन्ट आइसको आग्रहमा रिहाहुने मितिपछि पनि जेलमा नै राखिएकाहरुलाई लस एन्जलस काउन्टीले १४ मिलियन डलर क्षतिपूर्ति दिने भएको छ । लस एन्जलस काउन्टीको प्रहरीले जेलमा रहेका व्यक्तिको पेन्डिङ अध्यागमन अवस्थाका आधारमा उनीहरुको रिहाको मिति पछि पनि जेलमै राखेको भन्दै अदालतमा मुद्दा दायर भएको थियो ।
सन् २०१० को अक्टोबरदेखि सन् २०१४ को जुनसम्म १८ हजार ५ सय भन्दा धेरैलाई आइसको अनुरोधमा गैरकानुनी रुपमा जेलभित्रै राखिएको थियो । उनीहरु यो रकमबाट क्षतिपूर्तिका लागि योग्य हुनसक्ने कानुनविदहरुले जनाएका छन् । प्रहरीले सन् २०१४ पछि भने आइसको अनुरोध स्वीकार्न रोकेको थियो ।
आइसका गैरकानुनी अनुरोधहरु आँखा चिम्लेर स्वीकार्ने कानुन कार्यान्वयन निकायहरुका लागि यो गतिलो सन्देश भएको अमेरिकाका अमेरिकन सिभिल लिबर्टी युनियनकी कानुन व्यवसायी जेनी पास्क्वेरलाले बताइन् । यसरी आइसको अनुरोधमा जेलमा राखिएकाहरु २५० डलरदेखि २५ हजार डलरसम्मका लागि योग्य हुने अमेरिकन सिभिल लिबर्टी युनियनले जनाएको छ ।
कसले कति रकम पाउने भन्नेबारे भने कति लामो समय जेलमा राखिएको थियो भन्ने कुरामा निर्भर गर्छ । २५० डलरदेखि २५ हजार डलरसम्म बाँडेर बाँकी रहेको रकम एल एन्जलसमा अध्यागमन समस्या झेलिरहेकाहरुको सहायताका लागि खर्च गरिनेछ ।
सन् २०१८ मा संघीय न्यायाधिसले जेलमा कुनै पनि बन्दीलाई उनीहरुको सजाय सकिएपछि पनि इमिग्रेशन एण्ड कस्टम इन्फोर्समेन्टको आग्रहमा जेलभित्रै राख्नु चौथो संसोधन अधिकारको उल्लेघन रहेको निष्कर्ष निकालेका थिए । पर्यवेक्षण बोर्डले पारित गरेको १४ मिलियन डलर क्षतिपूर्ति दिने सहमतिमा न्यायाधिसले हस्ताक्षर गर्न भने बाँकी रहेको छ ।