पर्यटनमन्त्री योगेश भट्टराईलाई कोरोना संक्रमण
प्रकाशित मिति : आश्विन २४, २०७७ शनिबार
संस्कृति, पर्यटन तथा नागरिक उड्डयन मन्त्री योगेश भट्टराईलाई कोरोना संक्रमण भएको छ । शनिवार गरिएको पीसीआर परीक्षणमा संक्रमण देखिएको हो ।
काठमाडौं बाहिर केही कार्यक्रममा सहभागी भएर राजधानी फर्किएपछि हल्का ज्वरो आएपछि उनले परीक्षण गराएका थिए । मन्त्री भट्टराईले आफुलाई कोरोना संक्रमण भएको सामाजिक सञ्जालबाट जानकारी गराएका छन् ।
उनले आफ्नो सम्पर्कमा आएकालाई पनि सतर्क रहन र कुनै समस्या देखिएमा कोरोना परीक्षण गरी ढुक्क हुन आग्रह समेत गरेका छन् ।
पर्यटनमन्त्री भट्टराईले भनेका छन् – ‘गत सोमबार कोरोना परिक्षाण गर्दा रोपोर्ट नेगेटीभ आएको थियो । त्यसक्रममा काठमान्डौ बाहिरका केहि कार्यक्रममा सहभागी पनि भएँ । हिजो शुक्रबार बेलुका निवासमा फर्केपछि हल्का ज्वोरोको महशुस भयो । आज शनिबार पुन : कोरोना परिक्षण गर्दा रिपोर्ट पोजेटीभ आएको भरखरै जानकारी पाएको छु।’
‘हालसम्म पनि हल्का ज्वोरो बाहेक अरु समस्या देखिएको छैन् । केहि दिन यता मसँग संपर्कमा आउनु भएका महानुभावहरुलाई सतर्क रहन र कुनै समस्या देखिएमा कोरोना परिक्षण गरी ढुक्क हुन अनुरोध गर्दछु । मेरा कारणले कसैलाई पर्न जाने असुबिधाप्रति क्षमाप्राथी छु । होसियार रहनु र परिआएमा सामना गर्नु बाहेक के नै पो बिकल्प छ र!’ मन्त्री भट्टराईले सामाजिक सञ्जालमा लेखेका छन् ।