उपराष्ट्रपति उम्मेदवारबीचको बहस: केन्द्रमा कोरोना महामारी, ट्रम्पको बचाउ गर्ने पेन्सको कडा प्रयास
प्रकाशित मिति : आश्विन २१, २०७७ बुधबार
अमेरिकाका उप राष्ट्रपति पदका उम्मेदवारहरुबीचको पहिलो र एकमात्र बहस सभ्य र शालिन तरिकाले सम्पन्न भएको छ । राष्ट्रपति डोनाल्ड ट्रम्पलाई कोरोना संक्रमणपछिको उपराष्ट्रपति पदका उम्मेद्वारहरूको यो बहस महत्वपूर्ण बहस हो । पत्रकार सुजन पेजले बहस सञ्चालन गरेकी छिन् । ९० मिनेटको बहसलाई बिभिन्न मुद्दा र भागमा विभाजन गरिएको थियो ।
आजको बहसको केन्द्रमा कोरोना महामारी रह्यो भने माइक पेन्सले राष्ट्रपति ट्रम्पको बचाउ गर्न निकै समय खर्चे ।
सुजन पेजले बाइडेनले प्रशासनले ट्रम्प प्रशासनले गर्न नसकेको के गर्छ भनेर बहसका क्रममा प्रश्न सोध्दा कमला ह्यारिसले भनिन् -‘राष्ट्रपति ट्रम्पले कोरोना भाइरसलाई अफवाहको रूपमा वर्णन गरेका थिए। उनले यस महामारीका बारेमा कैयन महत्त्वपूर्ण जानकारी लुकाएका थिए । अझै पनि यसको सामना गर्न उनीसँग कुनै योजना छैन ।’
जवाफमा पेन्सले भने – ‘ट्रम्प सरकारले टास्क फोर्स बनायो र सबै आवश्यक कदम चाल्यो । राष्ट्रपति ट्रम्पले चीन र अमेरिका बीचका सबै उडानहरू रद्द गरे जब कि त्यतीबेला अमेरिकामा कोरोना संक्रमण ५ जनामा मात्र पुष्टी भएको थियो । त्यसबेला बाइेडनले उक्त निर्णयलाई अरु देशहरुलाई घृणा गर्ने विचारधाराबाट प्रभावित जेनोफोबिक निर्णय बताएका थिए ।’
कमला ह्यारिसले पेन्सका यी दाबीहरू झूठो भएको बताइन् । ट्रम्प प्रशासनको असफलताका कारण अमेरिकामा दुई लाख भन्दा बढीको ज्यान गएको उनले बताइन् ।
पेन्सले त्यसको प्रतिवाद गर्दै भने – ‘अमेरिकामा केहि पनि भएको छैन भन्नु त्यसका लागि कडा परिश्रम गर्ने अमेरिकाका सबै मानिसहरुको अपमान हो ।’
यदि ठोस कदम नचालेका भए अमेरिकामा २० लाखको ज्यान जाने पेन्सले बताए ।
सुसन पेजले व्हाइट हाउसमा गरिएको एउटा समारोहको बारेमा पनि प्रश्न उठाइन् । उक्त समारोहबाट ह्वाइट हाउसमा कोरोना फैलिएको बताइदै आएको छ । तर पेन्सले उक्त समारोहमा सबै सावधानी अपनाइएको दावी गरे ।
कमला ह्यारिसले जनताले ट्रम्पको प्रशासनको विश्वास नगर्ने भएकाले भ्याक्सिन आएपनि उनीहरुले नलिने बताइन् । तर पेन्सले जनताको जीवनको बारेमा कुनै राजनीति गर्न नहुने बताउँदै यो खोपलाई विश्वास नगर्नु गलत रहेको बताए ।
दुबै उम्मेदवारहरू स्वास्थ्यसम्बन्धि रेकर्डहरु सार्वजनिक गर्न तयार छन् ? भन्ने प्रश्नमा कमला ह्यारिसले भनिन् – ‘उनी स्वास्थ्य र कर सम्बन्धी सबै कागजातहरू सार्वजनिक गर्ने पक्षमा छिन्।’
ट्रम्पमा अमेरिकी इतिहासका आफ्नो ट्याक्स रिटर्नको रेकर्ड सार्वजनिक नगर्ने पहिलो राष्ट्रपति भएको ह्यारिसले बताइन् ।
ह्यारिसले भनिन् – ‘जब मैले सुने कि ट्रम्पले ७५० डलरमात्रै कर तिरे । मैले साढे ७ लाख डलर तिरेका होलान् भन्ने ठानें । तर साढे ७ सय नै रहेछ ।’
पेन्सले भने – ‘राष्ट्रपति ट्रम्पले हजारौंलाई रोजगारी दिएका छन् । उनको आम्दानी सम्बन्धी सबै जानकारीहरू सार्वजनिक रुपमा उपलब्ध छन्।’
बाइडेलने अमेरिकी जनताको स्वास्थ्यका लागि ओबामासँगै मिलेर ओबामा केयरको नीति ल्याएको ह्यारिसले बताउँदा पेन्सले त्यसलाई नराम्रो नीतिको रूपमा वर्णन गरे ।
दुबै उम्मेदवारलाई चीनको बारेमा राय माग्दा माइक पेन्सले भने – ‘चीन कोरोना महामारीको लागि जिम्मेवार छ किनकि यसले विश्वसँग सम्बन्धित जानकारी लुकायो। ट्रम्प चीनको अगाडि उभिए।उनले चीनको भ्रमणमा रोक लगाए । तर जो बाइडेनले यही निर्णयको विरोध गरे।’
कमला ह्यारिसले भनिन् -‘अमेरिकाको चीनसँगको सम्बन्ध बिग्रिएको कारण नै धेरै मानिसहरूहरुले ज्यान गुमाउनुपर्यो । ट्रम्पको चीनप्रतिको नीतिले जनताको रोजगारी गुमाए । किसानहरू टाट पल्टिए ।’
उनले भनिन् -‘ट्रम्पले चीनसँगको व्यापार युद्ध हारिसकेका छन् । हाम्रा सहयोगी देशका नेताहरुले ट्रम्पमाथि भन्दा शी जिनपिंगमाथि भरोसा भएको बताउन थालेका छन् ।’