अक्टोबर १३ देखि बुबाआमा र हजुरबुबाआमालाई क्यानडाको पीआर स्पोन्सर खुल्ला
प्रकाशित मिति : आश्विन २०, २०७७ मंगलबार
लामो ढिलाईपछि क्यानडाको अध्यागमन, शरणार्थी र नागरिकता मन्त्रालयले बुबाआमा र हजुरबुबाआमालाई क्यानडाको पीआर स्पोन्सर गर्न चाहनेहरुका लागि आवेदन खोल्ने भएको छ । सन् २०२० को यो कार्यक्रम तीनसाताका लागिमात्र खोलिने जनाइएको छ ।
पूर्वीय समय अनुशार अक्टोबर १३ को दिउसो १२ बजेदेखि आवेदन दिन सकिने भएको छ । यो कार्यक्रम मार्फत क्यानडाको नागरिकता लिइसकेकाहरु र पीआर भएकाहरुले आफ्ना बुबाआमा वा हजुरबुबाआमालाई क्यानडाको पीआरका लागि स्पोन्सर गर्नसक्नेछन् ।
स्पोन्सर गर्न चाहनेहरुले अक्टोबर १३ पछि आफूले स्पोन्सरका लागि न्यूनतम आम्दानीको मापदण्ड पूरा गरेको सुनिश्चित गर्दै स्पोन्सर गर्न चाहेको फर्म बुझाउनुपर्छ । त्यसपछि उनीहरुले आवेदन दिनका लागि सरकारका तर्फबाट निम्तापत्र प्राप्त गर्न सक्नेछन् । स्पोन्सर गर्न चाहनेहरुले नोभेम्बर ३ को पूर्वीय समय अनुशार दिउसो १२ बजेसम्म आवेदन दिइसक्नुपर्नेछ ।
अक्टोबर १३ पछि फर्म भर्न यहाँ क्लीक गर्नुहोला ।
समयअवधि सकिएपछि क्यानडाको आईआरसीसीले सम्भावित स्पोन्सरहरुलाई पूर्ण आवेदनका लागि सुचित गर्नेछ । स्पोन्सर गर्नका लागि १० हजारसम्मको सिमाबन्दी रहेकाले अक्टोबर १३ पछि यथाशीघ्र आवेदन दिन सुझाव दिइएको छ । छानिएका स्पोन्सरहरुलाई पूर्ण आवेदन दिनका लागि ६० दिनको अवधि दिइनेछ ।
आईआरसीसीले स्पोन्सरका लागि हुनुपर्ने न्यूनतम आम्दानीको मापदण्ड घटाएको छ । कोरोनाको महामारीका कारण आर्थिक प्रभाव परेकाले विगतको तुलनामा आम्दानीको मापदण्ड घटाइएको हो ।
कतिजनालाई स्पोन्सर गर्न कति आम्दानी आवश्यक छ ? थाहा पाउनुहोस् ।
सन् २०१९ मा क्यानडाको सरकारले बुबाआमा र हजुरबुबाआमालाई क्यानडाको पीआरका लागि २० हजार आवेदन स्वीकार गरेको थियो । तर यो बर्ष भने कोरोनाको महामारीका कारण साधनश्रोतको अभाव भएको भन्दै गतबर्षको तुलनामा आधा संख्यामा आवेदन स्वीकार गर्ने भएको छ । तर सन् २०२१ मा भने ३० हजार आवेदन स्वीकार गर्ने जनाइएको छ ।