राजधानी दाङ राख्ने प्रस्तावको विरुद्धमा कांग्रेसद्वारा भोलि रुपन्देही बन्द, आज राँके जुलुस !
प्रकाशित मिति : आश्विन १७, २०७७ शनिबार
प्रदेश ५ को नामाकरण र स्थायी राजधानी दाङ राख्ने प्रस्तावसँगै रुपन्देहीमा नेपाली कांग्रेसले आन्दोलनको तयारी गरेको छ । कांग्रेस रुपन्देहीको शनिबार बुटवलमा बसेको बैठकले विभिन्न आन्दोलनका कार्यक्रमहरु सार्वजनिक गर्दै युवा, विद्यार्थी तथा उद्योगी व्यवसायीहरुसँग छलफल अगाडी बढाएको छ ।
शुक्रबार बसेको २ घण्टा लामो बैठकपछि कांग्रेस रुपन्देहीका सचिव रामकृष्ण खाँणले विरोध स्वरुप राँके जुलुस, चक्का जाम तथा नेकपाका सांसदका घर अगाडी कालो झण्डा प्रर्दशन लगाएतका कार्यक्रमहरु रहेको जानकारी गराउनु भयो ।
प्रदेश सभामा शुक्रबार प्रदेश नामाकरण र स्थायी राजधानीको प्रस्ताव पेश भएसँगै बुटवलका विभिन्न ठाउँमा टायर बालेर विरोध जनाएको कांग्रेसले आज साँझ राँके जुलुस प्रर्दशन गर्ने भएको छ । खाँण अनुसार कांग्रेसले भोली जिल्ला बन्द गर्ने साथै नेकपाका सांसदका घर अगाडी कालो झण्डा प्रर्दशन गर्ने भएको छ । उहाँले विद्यार्थी नेताहरुलाई उग्र क्रियाकलाप नगर्न आग्रह गर्नुभएको छ । शुक्रबार नै पार्टी सभापती अब्दुल रज्जाकले विज्ञप्ती जारी गर्दै कांग्रेस रुपन्देही कठोर आन्दोलनमा उत्रिने चेतावनी दिनुभएको थियो ।
राजधानी सार्ने प्रस्तावको पक्षमा मतदान गर्न ह्वीप लगाउने नेकपाको निर्णय
प्रदेश ५ को नाम लुम्बिनी र स्थायी राजधानी दाङ हुने निश्चित भएपछि सत्तारुढ दल नेकपाले आफ्ना प्रदेश सभा सदस्यहरुलाई प्रस्तावको पक्षमा मतदान गर्न ह्विप गर्ने भएको छ । शुक्रबार प्रदेश ५ को प्रदेश सभामा आन्तरिक मामिला तथा कानून मन्त्री कुप्रसाद केसीले पेशको गरेको प्रस्तावका बारेमा छलफल गर्न बसेको सत्तारुढ दलको ६ घण्टा लामो बैठकले ह्विप जारी गर्ने निर्णय गरेको हो ।
प्रस्तावको पक्षमा मतदान गर्न ह्विप जारी गरिएको प्रदेश सांसद भोजप्रसाद श्रेष्ठले बताउनु भयो । सांसदहरुले पार्टीको निर्देशन अस्विकार गरे पार्टीबाट निस्कासन गरिने चेतावनी दिँदै उहाँले प्रदेशको नामाकरण र स्थायी राजधानीको प्रस्ताव स्वीकृत हुने दाबी गर्नुभयो ।