प्रदेश ५ को ‘स्थायी राजधानी- दाङ, नाम- लुम्बिनी’
प्रकाशित मिति : आश्विन १६, २०७७ शुक्रबार
प्रदेश–५ को स्थायी राजधानी दाङको राप्ती गाउँपालिकास्थित भालुवाङ र नाम लुम्बिनी रहने गरी प्रस्ताव पेश भएको छ । शुक्रबार बसेको प्रदेश सभा बैठकमा प्रदेश ५ का आन्तरिक मामिला तथा कानूनमन्त्री कुलप्रसाद केसीले प्रस्ताव पेश गरेका हुन् ।
यसअघि केपी शर्मा ओली र पुष्पकमल दाहालबीच दाङमा प्रदेश राजधानी बनाउने सहमति जुटेपछि प्रदेश सरकारले निर्णय गरेको हो । नेकपाका प्रदेश– ५ इन्चार्जसमेत रहेका मुख्यमन्त्री शंकर पोखरेलले दाङमा राजधानी बनाउनका लागि लबिङ गरिरहेका थिए । उनी पनि दाङकै स्थायी बासिन्दा हुन्। नेकपा महासचिव विष्णु पौडेल लगायतका नेता भने प्रदेश राजधानी बुटवललाई बनाउने पक्षमा थिए ।
प्रदेश सभाको दुईतिहाइ बहुमतले पारित गरेपछि प्रदेशको स्थायी राजधानी र नामको अन्तिम टुंगो लाग्नेछ । प्रदेश सरकारले दाङको भालुवाङ बजारलाई केन्द्रमा राखेर दाङको राप्ती गाउँपालिका, गढवा गाउँपालिका र अर्घाखाँचीको शीतगंगा गाउँपालिकालाई जोडेर प्रदेश राजधानी बनाउने निर्णय गरेको हो ।
भालुवाङ बजार बुटवलबाट करिब १०५ किलोमिटर पश्चिम राप्ती नदीको किनारमा अवस्थित छ । पूर्व–पश्चिम राजमार्गमा पर्ने यो बजारबाट नेपालगञ्जको दुरी करिब १५८ किलोमिटर छ ।
नेकपाका शीर्ष नेताहरु भालुवाङ बजारलाई प्रदेश राजधानी बनाउन सहमत भएपछि प्रदेशको स्थायी राजधानी र नामको टुंगो लाग्ने भएको हो । गाउँपालिकामा प्रदेश राजधानी तोक्ने प्रदेश ५ पहिलो प्रदेश हो ।
प्रदेश १ को राजधानी विराटनगर महानगरपालिकामा, २ को जनकपुर उपमहानगरपालिकामा, बागमतीको हेटौंडा उपमहानगरपालिकामा, गण्डकीको पोखरा महानगरपालिकामा, कर्णालीको वीरेन्द्रनगर उपमहानगरपालिकामा र सुदूरपश्चिमको गोदावरी नगरपालिकामा स्थायी राजधानी तोकिएको छ ।