अब अतिरिक्त शुल्कमा ३० दिनमा वर्क परमिट र विद्यार्थी भिसा थप्न वा बदल्न पाउने
प्रकाशित मिति : आश्विन १५, २०७७ बिहीबार
अमेरिकी संसदले अब आई १४० र आई १२९ आवेदनका साथमा अब विभिन्न भिसा थप्दा वा भिसाको स्टाटस बदल्दा भरिने आई ५३९ आवेदन र वर्क परमिटको आई ७६५ आवेदनमा समेत युएससीआईएसले शीघ्र प्रकृया अर्थात् प्रिमियम प्रोसेस अपनाउन सक्ने गरी मापदण्ड पारित गरेको छ । यस्तो मापदण्डमा अमेरिकी राष्ट्रपति डोनाल्ड ट्रम्पले हस्ताक्षर गरिसकेका छन् ।
मापदण्डले निश्चित आवेदनमा अतिरिक्त शुल्क तिरेर छिटो निर्णय गराउन सक्ने युएसीआईएसको कार्यक्रमलाई स्थायी रुपमा थप गरेको छ भने अतिरिक्त आवेदनमा समेत शीघ्र प्रकृया अपनाउन सकिने प्रावधान ल्याएको छ । तर शीघ्र प्रकृयाका लागि भने शुल्कबृद्धि गरिएको छ ।
रोजगारमा आधारित ग्रिनकार्ड आवेदन ईबी वान, टु र थ्रीका अन्तरगत आई १४० का लागि अहिलेसम्म १४४० डलर शीघ्र प्रकृया शुल्क रहेकोमा अब युएससीआईएसले उक्त आवेदनका लागि २५ सय डलर शुल्क लिनेछ । उक्त शुल्क लिएपछि युएससीआईएसले १५ दिनभित्र उक्त आवेदनबारे निर्णय दिनेछ ।
त्यस्तै रोजगारमा आधारित ग्रिनकार्ड आवेदन ईबी वान, टु र थ्री अन्तरगत बहुराष्ट्यि मेनेजर, राष्ट्रिय चासोको छुट र चिकित्सकहरुका सन्दर्भमा पनि अब शीघ्र प्रकृया शुल्क बढीमा २५ सय डलरसम्म हुनेछ । शीघ्र पकृया शुल्क तिरेपछि यी आवेदनहरुमा युएससीआईएसले ४५ दिनभित्र निर्णय दिनेछ ।
त्यस्तै कामदार भिसाका आवेदन आई १२९ का लागि पनि शीघ्र प्रकृया शुल्क २५ सय डलर कायम गरिएको छ । अतिरिक्त शुल्क तिरेपछि यी आवेदनमा युएससीआईएसले १५ दिनभित्र निर्णय दिनेछ ।
एफ, जे र एम भिसामा स्टाटस परिवर्तन गर्दा वा भिसा थप गर्दा १७५० डलरसम्म शीघ्र प्रकृया शुल्क लिने प्रावधान ल्याइएको छ । शीघ्र प्रकृया शुल्क तिरेका आवेदनबारे युएससीआईएसले ३० दिनभित्र निर्णय दिनेछ ।
त्यस्तै ई, एच, एल, ओ, पी र आरका डिपेन्डेन्टहरुका भिसा थप्दा वा स्टाटस परिवर्तन गर्दा १७५० डलरसम्म शीघ्र प्रकृया शुल्क लिने प्रावधान ल्याइएको छ । शीघ्र प्रकृया शुल्क तिरेका आवेदनबारे युएससीआईएसले ३० दिनभित्र निर्णय दिनेछ ।
वर्क परमिटको आवेदनमा समेत यो सुविधा ल्याइएको छ । वर्क परमिट आवेदनमा १७५० डलरसम्म शीघ्र प्रकृया शुल्क लिने प्रावधान ल्याइएको छ । शीघ्र प्रकृया शुल्क तिरेका आवेदनबारे युएससीआईएसले ३० दिनभित्र निर्णय दिनेछ ।
शीघ्र प्रकृयाको कानुन तत्कालै लागु हुने बताइएपनि यसरबारे युएससीआईएसले छुट्टै सुचना प्रकाशित गर्ने अपेक्षा गरिएको छ । थपिएको शीघ्र प्रकृया कार्यक्रम आवेदकका लागि कहिलेदेखि उपलब्ध हुने भन्ने सन्दर्भमा युएससीआईएसले निकट भविश्यमा जानकारी गराउनेछ । तर निश्चित प्रकारका आई १४० र आई १२९ आवेदनमा भने अहिले पनि शीघ्र प्रकृया उपलब्ध छ ।