शुल्कबृद्धि रोक्ने अदालतको आदेश कार्यान्वयन, ‘पुरानै शुल्क र फर्म लिन्छौं’ – युएससीआईएस
प्रकाशित मिति : आश्विन १५, २०७७ बिहीबार
अमेरिकाका संघीय न्यायाधिसले युएससीआइएसलाई शुल्कबृद्धिमा लगाएको रोक युएससीआईएसले कार्यान्वयन गरेको छ । शुल्कबृद्धि रोक्ने अदालतको आदेश जारी रहँदासम्म पुरानै शुल्क र आवेदनका पुरानै संंस्करणहरु स्वीकार गरिने युएससीआईएसले जनाएको छ ।
अमेरिकी सरकारको युएससीआईएसले अक्टोबर २ शुक्रबारदेखि अमेरिकी नागरिकता लगायतका कैयन आवेदनमा शुल्कबृद्धि गर्न लागेको थियो । संघीय न्यायाधिसले प्राथमिक निरोधक आदेश जारी गर्दै युएससीआईएसलाई शुल्कबृद्धिमा रोक लगाएका हुन् ।
प्राथमिक निरोधक आदेश कार्यान्वयनमा रहँदासम्म युएससीआईएसले नयाँ शुल्क लागु गर्न नपाउने र्भएपनि यसबारे युएससीआईएसले कुनै प्रतिकृया जनाएको थिएन । तर आज अदालतको आदेश कायम रहँदासम्म पुरानै शुल्क लिने स्पष्ट पारेको हो ।
मंगलबार नर्दन डिस्ट्रिक्ट अफ क्यालिफोर्नियाका न्यायाधिस जेफरी ह्वाइटले नयाँ शुल्कबृद्धि कार्यान्वयनमा रोक लगाएका हुन् । न्यायाधिसको आदेश देशब्यापी रुपमा लागु भएको छ । तर सरकारले नाइन्थ सर्किट कोर्टबाट शुल्कबृद्धिको नियम कार्यान्वयको माग गर्दै पुनरावेदन गर्ने जनाइएको छ ।
हालसम्म अमेरिकी नागरिकता आवेदन एन ४०० का लागि अनलाइन आवेदन शुल्क ६४० रहकोमा ५२० डलर बढाएर ११६० डलर लागु गर्न लागिएको थियो । त्यस्तै कागजीरुपमा फाइल गर्नेहरुले भने ११७० डलर लागु गर्न लागिएको थियो । अहिलेको प्रावधान अनुशार नागरिकता आवेदन कागजी रुपमा फाइल गर्नका लागि कम आम्दानी हुनेलाई ३२० डलर र अरुलाई ६४० डलर शुल्क रहेको छ ।
आफन्तका लागि ग्रिनकार्ड आवेदन आई १३० फाइल गर्दा अहिलेसम्म ५३५ डलर शुल्क रहेकोमा नयाँ शुल्क अनलाइन फाइल गर्दा ५५० डलर र कागजी फाइल गर्दा ५६० डलर लागु गर्न लागिएको थियो ।
ग्रिनकार्डको आवेदन आई ४८५ को शुल्क भने १० डलर कम गरेर ११३० लागु गर्न लागिएको थियो । गैरआप्रवासी भिसा थप वा स्टाटस परिवर्तनका लागि अहिलेसम्म ३७० डलर रहेकोमा नयाँ शुल्क अनलाइनबाट फाइल गर्दा ३९० र कागजी रुपमा फाइल गर्दा ४ सय डलर लागु गर्न लागिएको थियो ।
यसअगाडि एसाइलम आवेदन आई ५८९ फाइल गर्न निशुल्क रहेकोमा नयाँ नियम अनुशार ५० डलर शुल्क लागु गर्न लागिएको थियो । अनलाइन आवेदन दिनेहरुका लागि शुल्क समेत कागजी आवेदनका तुलनामा कम गरिएको थियो ।