अमेरिकी चुनावमा लागि काठमाडौंमा रहेको दूतावासमा मतपत्र बुझाउने डेडलाइन अक्टोबर २
प्रकाशित मिति : आश्विन १२, २०७७ सोमबार
अमेरिकाको राष्ट्रपति चुनावमा अमेरिकी नागरिकले विश्वको जुनसुकै कुनाबाट पनि मतदान गर्न सकिने प्रावधान रहेको छ । जस अन्तरगत यसबर्षको राष्ट्रपति चुनावमा मतदान गर्न चाहने नेपालमा रहेका अमेरिकनहरुले काठमाडौंमा रहेको अमेरिकी दूतावासमा मतपत्र बुझाउने डेडलाइन अक्टोबर २ सम्म रहेको छ ।
चुनावको दिनमा अमेरिकामा अनुपस्थीत हुननसक्नेहरुले अनुपस्थीत मतपत्र प्राप्त गर्नसक्ने प्रावधान रहेको छ । उक्त मतपत्र प्राप्त गरेकाहरुले अक्टोबर २ सम्म मतदान गरेको मतपत्र दूतावासमा बुझाउन अमेरिकी दूतावास काठमाडौंले नेपालमा रहेका अमेरिकी नागरिकहरुलाई सुचित गरेको छ ।
अमेरिकी दूतावास र कन्सुलेटहरु मतदानस्थल नभएको तर अक्टोबर २ सम्म प्राप्त मतपत्रहरु सम्बन्धित निकायमा पुर्याइने दूतावासले स्पष्ट पारेको छ । अधिकांश राज्यहरुमा अनुपस्थीत मतपत्र अक्टोबर ३ सम्म पुगिसक्नुपर्ने प्रावधान रहेका कारण यथाशीघ्र मतदान गरेको मतपत्र फर्काउन दूतावासले सुचित गरेको छ ।
दूतावासले मतपत्र जम्मा गरेर पठाउन म्यादमा मतपत्र पठाउन नसकेकाहरुले कुरियर सेवामार्फत पनि मतपत्र पठाउन सक्नेछन् । कुनै राज्यले अनुमति प्रदान गरेको खण्डमा विद्युतीय रुपमा पनि त्यस्ता मतपत्रहरु पठाउन सकिनेछ । तर यस्ता मतपत्रहरु सम्बन्धित निकायमा समयमै नपुगेको खण्डमा भने गणना हुनेछैनन् ।
राज्यको तोकेको डेडलाइन भन्दा अगाडि मतदाता नामावलीमा सुचिकृत व्यक्तिले विदेशमा रहेको अवस्थामा समेत अनुपस्थीत मतपत्र प्राप्त गर्न सकिने प्रावधान रहेको छ । यदि मतपत्र प्राप्त गर्न नसकेको खण्डमा संघीय लिखित अनुपस्थीत मतपत्र भर्न समेत सकिनेछ । मतपत्र समयमै नपुगेको खण्डमा संघीय लिखित अनुपस्थीत मतपत्रमार्फत मतको गणना गरिनेछ ।
संघीय लिखित अनुपस्थीत मतपत्रमार्फत मतदान गरिसकेपछि मतपत्र प्राप्त भएको खण्डमा उक्त मतपत्रमार्फत समेत मतदान गर्न सकिनेछ । यो अवस्थामा मतपत्र निर्वाचन अधिकारीसमक्ष नपुगेको खण्डमा संघीय लिखित अनुपस्थीत मतपत्रमार्फत मत गणना गरिनेछ, दुईवटा मत गणना हुनेछैन ।
अहिले नेपालमा रहेका अमेरिकनहरुले धमाधम अनुपस्थीत मतपत्रमार्फत मतदान गरेर दूतावासमा बुझाइरहेको दूतावासले जनाएको छ । तर अहिलेसम्म कतिजनाले मतदान गरे भन्नेबारे भने केही खुलाइएको छैन ।
सबै तस्वीरहरु अमेरिकी दूतावास काठमाडौंको सामाजिक सञ्जालबाट साभार ।