कोरोनाबिरुद्धको भ्याक्सिन २०२१ को मध्य अगाडि आउने आशा छैन : विश्व स्वास्थ्य संगठन
विश्व स्वास्थ्य संगठनले कोरोनाबिरुद्धको भ्याक्सिन सन् २०२१ को मध्यभन्दा अगाडि नआउने अपेक्षा गरेको छ । शुक्रबार संगठनका प्रवक्ताले भ्याक्सिनको प्रभावकारिता र सुरक्षा जाँच गर्न आवश्यक भएको बताएका छन् ।
विश्व स्वास्थ्य संगठनका प्रवक्ता मार्गारेट ह्यारिसका अनुशार कुनै पनि भ्याक्सिनले पूर्व क्लीनिकल परीक्षणका क्रममा विश्व स्वास्थ्य संगठन कम्तीमा ५० प्रतिशत स्पष्ट प्रभावकारिता समेत देखाउन सकेको छैनन् । रसियाले गत अगस्तमा नै मानवमा परीक्षण गरेको दुईमहिनाभन्दा कम अवधिमा नै भ्याक्सिनलाई स्वीकृति प्रदान गरेको थियो ।
अमेरिकाका जनस्वास्थ्य अधिकारीहरु र भ्याक्सिन कम्पनी फाइजरले बिहिबार अक्टोबरको अन्त्यसम्ममा भ्याक्सिन वितरणका लागि तयार हुनसक्ने बताएका छन् । ट्रम्प प्रशासनले नोभेम्बर १ सम्म भ्याक्सिन वितरण केन्द्रहरुको सबै तयारी पूरा गर्न राज्यहरुलाई निर्देशन दिएको छ ।
तर शुक्रबार जेनेभामा बोल्दै मार्गारेट ह्यारिसले भनिन् – ‘अर्को बर्षको मध्यअगाडि हामीले बृहतमात्रामा भ्याक्सिन तयार हुने कुनै अपेक्षा गरेका छैनौं । तेश्रो चरणको परीक्षणबाट भ्याक्सिन सुरक्षित र प्रभावकारी भए नभएको जाँच्नुपर्ने भएकाले लामो समय लाग्नेछ ।’
सबै परीक्षणबाट उपलब्ध तथ्यांकहरु सार्वजनिक गर्नुपर्ने र तुलना गर्नुपर्ने उनले बताएकी छिन् । विश्व स्वास्थ्य संगठन र गाभी भ्याक्सिन एलायन्सले विश्वव्यापी भ्याक्सिन वितरण योजना कोभ्याक्सको नेतृत्व गरेका छन् । यसको उद्देश्य सबैभन्दा धेरै जोखिममा रहेका हरेक देशका व्यक्तिलाई पहिलो भ्याक्सिन उपलब्ध गराउनु हो ।
कोभ्याक्सले सन् २०२१ को अन्त्यसम्ममा भ्याक्सिनका २ बिलियन डोजहरु आपूर्ति गर्ने लक्ष्य लिएको छ । तर केही देशहरुले आफ्ना देशका लागि दुईपक्षीय सम्झौतामार्फत भ्याक्सिनका डोजहरु सुरक्षित गरिसकेका छन् । अमेरिकाले विश्व स्वास्थ्य संगठनको कोभ्याक्स कार्यक्रममा सहभागि नहुने बताइसकेको छ ।
