न्युजर्सीमा कागजपत्रविहिनले समेत पेशागत लाइसेन्स पाउने बिल पारित, गभर्नरले हस्ताक्षर गर्दै
प्रकाशित मिति : श्रावण १८, २०७७ आईतबार
अमेरिकाको न्युजर्सीमा कागजपत्रविहिनले समेत पेशागत लाइसेन्स पाउने बिल पारित भएको छ । गभर्नर फिल मर्फीले हस्ताक्षर गरेपछि यो बिल कार्यान्वयनमा आउनेछ ।
यो बिल अनुशार अब न्युजर्सीमा कागजपत्रविहिनले समेत एकाउन्टेन्ट, प्रशोधन विशेषज्ञ वा फार्मासिस्ट लगायतका कैयन क्षेत्रमा पेशागत लाइसेन्स प्राप्त गर्नसक्नेछन् । न्युजर्सीको सिनेटले गतसाता पारित गरेको यो बिल एसेम्बलीबाट पनि पारित भएको हो । समाजमा र अर्थतन्त्रमा भाग लिनका लागि क्षमतावान कागजपत्रविहिनलाई अब कुनै अवरोध नहुने भएको छ ।
तर अमेरिकाका बेरोजगारी दर बढेको अवस्थामा कागजपत्रविहिनलाई समेत पेशागत र व्यवसायिक लाइसेन्स प्रदान गर्ने यो बिलबाट ग्रिनकार्ड वा नागरिकहरुको रोजगारीमा असर पर्नसक्ने भन्दै आलोचना समेत भएको छ । न्युजर्सीमामात्र १३ लाखभन्दा धेरै बेरोजगार भएका छन् ।
यो बिलका समर्थकहरुले भने कोरोनाको महामारीका कारण स्वास्थ्यकर्मी र अन्य अत्यावश्यक कामदारको अभाव भएको सन्दर्भमा त्यस्तो अभाव पूर्ति गर्नसक्ने बताएका छन् । कागजपत्रविहिनलाई समेत पेशागत लाइसेन्स प्राप्त गर्ने अधिकार प्रदान गर्ने बाटोमा अगाडि बढ्ने अमेरिकाको पूर्वी क्षेत्रको राज्यमा न्युजर्सी पहिलो भएको छ । क्यालिफोर्निया, नेभाडा, न्यु मेक्सिको लगायतका राज्यमा यस्तो प्रावधान पहिलेदेखि नै छ ।
न्युजर्सीमा एकाउन्टेन्ट, आर्किटेक्ट, अक्युपन्चरिस्ट, अडियोलोजिस्ट, ब्यूटिसियन, कोर्ट रिपोर्टर, कस्मेटोलोजिस्ट, डाक्टर, डेन्टिस्ट, इन्जिनियर, होम इन्सपेक्टर, मोर्टिसियन, नर्स, थेरापिस्ट, फार्मासिस्ट, सामाजिक कार्यकर्ता लगायतका कैयन पेशामा लाइसेन्सको आवश्यकता पर्छ । यो नियम पारित भएपछि कागपत्रविहिनले समेत त्यस्ता लाइसेन्सहरु प्राप्त गर्नसक्नेछन् ।
यद्यपी अमेरिकाको संघीय कानुनले वर्क परमिट र सोसल सेक्युरिटी नम्बर नहुने कागजपत्रविहिनलाई काममा लगाउन बर्जित गरेको छ ।