सहमतिका लागि भन्दै नेकपाका उपाध्यक्ष गौतमले सार्वजनिक गरे ६ बुँदा
प्रकाशित मिति : श्रावण १३, २०७७ मंगलबार
सत्तारूढ नेपाल कम्युनिष्ट पार्टी (नेकपा)का उपाध्यक्ष वामदेव गौतमले पार्टी एकता जोगाउनका लागि भन्दै दुई अध्यक्षसमक्ष ६ बुँदे सुझाव दिनुभएको छ । नेता गौतमले एकता महाधिवेशनसम्म अध्यक्ष र प्रतिनिधिसभाको यस कार्यकाल अवधिभर प्रधानमन्त्रीलाई जिम्मेवारीमा कायम राख्ने प्रस्ताव अघि सार्नुभएको छ ।
आजका लागि बोलाइएको स्थायी कमिटी बैठक स्थगित भएका बेला गौतमले उक्त सुझाव राख्नुभएको हो । छ बुँदे सुझावमा गौतमले पुष्पकमल दाहाल प्रचण्ड एकता महाधिवेशनसम्म सम्पूर्ण कार्यकारी अधिकारसहित अध्यक्षको जिम्मेवारीमा रहने प्रस्ताव पनि गर्नु भएको छ ।
त्यस्तै उक्त प्रस्तावमा प्रधानमन्त्री निवास बालुवाटारमा पार्टीका बैठक नगर्न पनि सुझाव समेत दिनुभएको छ । ‘अबदेखि पार्टीका बैठकहरू पार्टी कार्यालयमा आयोजना गर्ने,’ छ बुँदे सुझावमा लेखिएको छ ।
