शनिबार नागपञ्चमी, पण्डित शास्त्रीले न्युयोर्कमा निशुल्क नाग वितरण गर्ने
प्रकाशित मिति : श्रावण ७, २०७७ बुधबार
शनिबार नागपञ्चमी । खासगरी नागपञ्चमीदेखि हिन्दुहरुका चाडपर्वहरु सुरु हुने गर्छन् । नागपञ्चमीको दिनमा घस्रेर जमिनमा हिड्ने जनावरहरुको पूजा गर्ने चलन रहेको छ भने घरघरमा नाग अंकित चित्र टाँस्ने चलन रहेको छ ।
न्युयोर्कको रिजउड निवासी ज्योतिष पण्डित उद्धव शास्त्रीले नागपञ्चमीको अवशरमा सबैलाई निशुल्क नाग अंकित चित्र वितरण गर्ने बताउनुभएको छ । नागपञ्चमीको दिनमा नाग अंकित चित्र टाँस्न चाहनेहरुले शास्त्रीलाई सम्पर्क गरेर निशुल्क नागको चित्र प्राप्त गर्न सक्नेछन् । शास्त्रीलाई ६१५ ४३९ ७७९८ नम्बरमार्फत सम्पर्क गर्न सकिनेछ ।
शास्त्रीले अमेरिकामा समेत आफ्नो धर्म र संस्कृति जोगाइराख्न नागको चित्र टाँस्ने कामलाई निरन्तरता दिइरहेको बताउनुभयो । विगतका बर्षहरुमा रिजउडमा रहेको मन्दिरबाट नागको चित्र वितरण गरिदै आएपनि यो बर्ष कोरोनाको महामारीका कारण त्यो सम्भव नभएकाले आफूसँग सम्पर्क गरेर प्राप्त गर्न सकिने उहाँको भनाई छ ।
नागपञ्चमीका दिनमा गरिएका पूजा अर्चना वास्तवमै नाग देवता समक्ष पुग्ने जनविश्वास रहेको छ । खासगरी १२ वटा नागहरु अनन्त, बासुकी, शेष, पद्म, कम्बला, कारकोटाका, अश्भतरा, ध्रितराष्ट्र, शंकल्पा, कालिया, तक्शका र पिंगला नागको पूजा गर्ने चलन रहेको छ ।
यीनै नागहरु अंकित चित्र लिएर पुरोहितहरु आआफ्नो जजमानको घरको दैलोमा गाइको गोबर र दुबो लिएर नाग टाँस्न जाने प्रचलन रहेको छ । दैलो वा मुल खाँबोमा टाँसिएको नागको चित्रले बर्षभरी रक्षा गर्ने जनविश्वास रहेको छ ।