अमेरिका : साना विजनेशका लागि संघीय अग्रिम राहतको रकम सकियो
साना व्यवसायलाई अमेरिकाको सरकारले प्रदान गर्दै आएको इकोनोमिक इन्जुरी डिसास्टर लोनको अग्रिम राहत रकम सकिएको एसबीएले जनाएको छ । अमेरिकी संसदले आग्रिम राहतका लागि छुट्याएको २० बिलियन डलर समाप्त भइसकेको हो ।
अमेरिकी सरकारले कोरोनाबाट प्रभावित विजनेशका लागि एकहजारदेखि १० हजारसम्म अग्रिम राहतको व्यवस्था गरेको थियो । जुन रकम विजनेशहरुले फिर्ता गर्नुनपर्ने र तत्काल राहतका लागि प्रदान गरिदै आएको थियो ।
यद्यपी एसबीएले ईआईडीएल लोन अन्तरगत आवेदनहरु भने स्वीकार गर्नेछ । तर तिर्न नपर्ने १ हजारदेखि १० हजारसम्मको अग्रिम राहत भने दिनेछैन । ईआईडीएल लोन २ मिलियनसम्मको हुन्छ भने व्याजदर नाफामुलकका लागि ३ दशमलव ७५ प्रतिशत र गैरनाफामुलकका लागि २ दशमलव ७५ प्रतिशतसम्म हुन्छ । यो ऋण ३० बर्षभित्र तिर्न सकिन्छ ।
आइतबारसम्म एसबीएले झण्डै ६ मिलियन रोजगारदाताहरुलाई अग्रिम राहत प्रदान गरिसकेको छ । यो राहत ५ सय वा त्यो भन्दा कम कामदार भएका विजनेशलाईमात्र प्रदान गरिदै आएको थियो ।
न्युयोर्कमा मात्र ३ लाख ९२ हजार ३ सय ६६ रोजगारदाताहरुले १ दशमलव १ बिलियन डलरभन्दा धेरै रकम प्राप्त गरिसकेका छन् । अमेरिकी संसदले गत अप्रिलमा अग्रिम राहतका लागि थप रकम उपलब्ध गराएको छ भने उक्त रकम पुन थप्ने सम्भावना पनि रहेको छ ।
