प्राविधिक समस्या आएको भन्दै अमेरिका र क्यानडाबाट गएका नेपालीलाई दोहामा १५ घण्टा ट्रान्जिट
प्रकाशित मिति : असार १८, २०७७ बिहीबार
अमेरिका र क्यानडाबाट गएका एकसयजना नेपालीलाई दोहामा १५ घण्टाभन्दा लामो ट्रान्जिटमा राखिएको छ । दोहामा ७ देखि ९ घण्टासम्मको मात्र ट्रान्जिट हुने बताएर अमेरिका र क्यानडाबाट लगिएपनि त्यहाँ १५ घण्टाभन्दा बढी ट्रान्जिटमा राखिएको छ ।
कतारको समय अनुशार गएराती १२ बजेर १५ मिनेटमा विमान उड्ने बताइएपनि यो समाचार तयार पार्दासम्म विमान उड्न सकेको छैन । कतारको समय अनुशार अहिले विहान साढे ७ बजे विमान उड्ने तय भएको र नेपालमा दिउसो साढे २ बजे अवतरण गर्ने जनाइएको छ ।
अमेरिका र क्यानडाका विभिन्न विमास्थलबाट कतार एयरवेजमार्फत नेपालीहरु जुलाई १ मा दोहा गएका थिए भने दोहाबाट चार्टड उडानमार्फत नेपाल लैजाने तय भएको थियो ।
जुलाई १ मा प्रस्थान गर्नेमा अमेरिकाबाट ६९ जना र क्यानडाबाट ३१ जना नेपालीहरु रहेको एरो नेपाल ट्राभलका राकेश तुलाधरले जानकारी दिए । अमेरिका र क्यानडाबाट नेपाल जानेहरुका लागि टिकट दर १६ सय अमेरिकी डलर तोकिएको थियो ।
नेपाल पासपोर्ट हुनेहरु र कोभिड १९ टेस्टको प्रमाणपत्र हुनेहरुलाईमात्र विमानमा चढाइएको थियो । यसअगाडि अमेरिकाबाट टर्किस एयरलाइन्स र कतार एयरवेजमार्फत दुईपटक नेपालीहरु नेपाल गइसकेका छन् ।
तीनपटक अमेरिकाबाटमात्र झण्डै ६ सय नेपालीहरु नेपाल फर्किसकेका छन् । यसअगाडि कतार एयरवेजमार्फत २४६ जना नेपालीहरु अमेरिकाबाट नेपाल फर्केका थिए ।