नागरिकता वितरण समारोहहरु अमेरिकाको प्राथमिकतामा, जुनमामात्र साढे ६४ हजारलाई नागरिकता
प्रकाशित मिति : असार १८, २०७७ बिहीबार
अमेरिकी सरकारको युएससीआईएसले नागरिकता वितरण समारोहहरुलाई उच्च प्राथमिकतामा राखेको छ । कोरोनाको महामारीका कारण मार्च महिनाको दोश्रो सातापछि स्थगित भएका नागरिकता वितरण समारोहहरु जुनको पहिलोसाताबाट सुचारु गरिएको थियो ।
जुन महिनामामात्र ६४ हजार ५ सयलाई नागरिकता वितरण गरिएको युएससीआईएसले जनाएको छ । त्यस्तै जुलाई १ देखि ७ सम्म अमेरिकाको स्वतन्त्रता दिवशको अवशरमा युएससीआईएसले दर्जनौं नागरिकता वितरण समारोहहरुको आयोजना गरिरहेको छ ।
कोरोनाको महामारीका कारण स्थगित भएका सबै नागरिकता वितरणको काम जुलाईभरमा सक्ने युएससीआईएसले लक्ष्य लिएको छ । तर नागरिकता वितरण समारोहहरु सानासाना र फरक शैलीमा गरिएका छन् । कतिपय नागरिकता वितरण समारोहहरु ड्राइभ थु्रमा समेत गरिएका छन् ।
अमेरिकी राष्ट्रपति डोनाल्ड ट्रम्पको कार्यकारी आदेशले अमेरिकामा डिसेम्बरसम्मका लागि आप्रवासी र कामदार भिसामा प्रतिबन्ध लागेको अवस्थामा युएससीआईएसले साधनश्रोत नागरिकता वितरणतिर लगाएको हो । अमेरिकामा पेन्डिङ अवस्थामा रहेका ग्रिनकार्डका आवेदन समेत चुपचाप होल्डमा राखेर युएससीआईएसका कर्मचारीहरुलाई नागरिकता वितरणमा लगाइएको छ ।
कर्मचारीलाई तलब खुवाउने रकमको अभावमा अर्कोमहिनादेखि १३ हजारभन्दा बढी कर्मचारीलाई बेतलवी विदा दिने योजनामा युएससीआईएस रहेको छ । संसदले तलबका लागि बजेट विनियोजन गरेको खण्डमा भने युएससीआईएसका कर्मचारीहरुलाई विदा दिइनेछैन ।
झण्डै २० हजार कर्मचारीहरुमा १३ हजार ४ सय कर्मचारीहरुलाई विदा दिएपछि अमेरिकाको ग्रिनकार्ड र नागरिकता लगायतका विषयमा काम गर्ने मुख्य एजेन्सी लगभग ठप्पप्राय हुनेछ । कोरोनाको महामारीका कारण युएससीआईएसले सुचारु गर्न १ दशमलव २ बिलियन फण्डको आवश्यकता रहेको छ ।