माल्दिभ्स, नेपाल र श्रीलंकाका लागि विश्व बैंकको राष्ट्रिय निर्देशकमा फारिस नियुक्त
प्रकाशित मिति : असार १७, २०७७ बुधबार
विश्व बैंकले माल्दिभ्स, नेपाल र श्रीलंकाको राष्ट्रिय निर्देशकमा फारिस हदाद जर्भोसलाई नियुक्त गरेको छ। काठमाडौं उप-क्षेत्रीय कार्यालयमा आधारित रहनेगरी विश्व बैंकका तर्फबाट मल्दिभ्स, नेपाल र श्रीलंकाको नेतृत्व गर्दै करिब ५ अर्ब ५० करोड अमेरिकी डलर बराबरको चालु कार्यक्रमको नेतृत्व गर्नेछन्।
जर्भोसभन्दा पहिले यी तीन देशका राष्ट्रिय निर्देशक रहेकी आइडा जी.पस्वराई-रिद्धीहोले विश्व बैंकमै अर्को नयाँ कार्यभार ग्रहण गर्दैछिन्। यसअघि जर्भोस नेपालका लागि विश्व बैंकका राष्ट्रिय प्रबन्धक थिए।
अमेरिकी नागरिक जर्भोस सन् १९९६ देखि विश्व बैंकसँग आबद्ध छन्। उनले यसअघि मलेसिया र बोलिभियामा पनि राष्ट्रिय प्रबन्धकको रूपमा काम गरिसकेका छन्।
कोभिड-१९ का कारण जनस्वास्थ्य र आर्थिक क्षेत्रमा परेका तत्काल र दीर्घकालीन असरहरूको सम्बोधन गर्न तीनवटै देशहरूले शीघ्र कदम चाल्नुपर्ने आवश्यकता रहेको वर्तमान परिप्रेक्ष्यमा उनको नियुक्ति भएको हो।
‘देशहरूले कोभिड-१९ संकटका विरूद्ध जुध्दै गर्दा जनजीवन र जनजीविकाको संरक्षण गर्दै आर्थिक सुधार र पुनर्स्थापना गर्नु सबैभन्दा महत्वपूर्ण छ,’ उनलेे भने, ‘विश्व बैंकले आर्थिक लगानी तथा सहयोग गरेका कार्यक्रमहरू मार्फत कोभिड-१९ ले जनस्वास्थ्य र आर्थिक क्षेत्रमा निम्त्याएका असरहरूलाई कम गर्नु र रोजगारीका अवसरहरूको सिर्जना गर्दै समावेशी र दीगो विकासको सुनिश्चितता गर्नु मेरो पहिलो प्राथमिकता रहनेछ। यसका लगि म तिनै राष्ट्रका सरकारहरू, विकासका साझेदारहरू, निजी क्षेत्र र नागरिक समाजसँग मिलेर काम गर्न उत्सुक छु।’
विश्व बैंकले मल्दिभ्स, नेपाल र श्रीलंकाका सरकारहरूलाई कुल ३५ करोड डलरभन्दा बढीको कोभिड-१९ आपतकालीन प्रतिकार्य परियोजनाअन्तर्गत सहयोग गरिरहेको छ। जसले यी राष्ट्रहरूमा यस महाव्याधिको रोकथाम, पहिचान र प्रतिकार्य गर्न र जनस्वास्थ्य प्रणाली पूर्वतयारीलाई सुदृढ गर्न मद्दत गर्नेछ।