हङकङमाथि प्रभाव बढाउन चीनद्वारा राष्ट्रिय सुरक्षा कानुन पारित
प्रकाशित मिति : असार १६, २०७७ मंगलबार
चीनले हङकङक माथि प्रभाव बढाउन विवादस्पद राष्ट्रिय सुरक्षा कानुन पारित गरेको छ । उक्त कानुन लागु भएसँगै हङकङमा चिनियाँ प्रभाव बढ्ने र हङकङको स्वतन्त्रता संकुचित हुने बताइएको छ ।
चीनले गत महिना पृथक्तावाद, राज्यविप्लव, आतंकवाद र विदेशी शक्तिसँगको मिलेमतोजस्ता गतिविधिलाई अपराधका रुपमा व्याख्या गरेको छ । त्यसैगरी विरोध प्रदर्शन र अभिव्यक्ति स्वतन्त्रताको दायरा पनि खुम्च्याएको छ ।
गत वर्ष चीनसँग सुपुर्दगी गर्न पाउनेसम्बन्धी विधेयकको विरोधमा हङकङमा प्रजातन्त्र समर्थकहरुले सात महिनाभन्दा लामो समय आन्दोलन गरेका थिए । निरन्तरको आन्दोलनपछि हङकङ सरकारले उक्त विधेयक फिर्ता लिएको थियो । हङकङमा कोरोना संक्रमण नियन्त्रणका लागि चीनसँगका सीमाहरु बन्द गर्नसमेत आन्दोलन गरिएको थियो ।
अब नयाँ कानुन लागु भएसँगै यस्ता आन्दोलनहरु र विरोध प्रदर्शनहरुमाथि प्रतिबन्ध लगाइने भन्दै आलोचना भइरहेको छ । यस कानुनले हङकङको न्यायिक र अन्य स्वतन्त्रताहरूलाई ध्वस्त पारिदिनेमा टिप्पणीकारहरुले चिन्ता व्यक्त गरेका छन् ।
सन् १९९७ मा हङ्कङलाई ब्रिटिश नियन्त्रणबाट चीनलाई हस्तान्तरण गरिएको थियो । उक्त सम्झौताअनुसार चीनले एक मुलुक, दुई प्रणालीको प्रावधान स्वीकार गर्दै हङकङलाई बढी स्वायत्ता प्रदान गरिएको थियो ।
चीनले भने हङकङमा पछिल्लो समय पृथक्तावादी गतिविधि, राज्यविप्लव, आतंकवदा र विदेशी शक्तिसँग मिलोमतो बढ्दै गएकाले त्यस्ता गतिविधि रोक्न कानुन आवश्यक भएको बताएको छ । चीनले उक्त कानुनको आलोचनालाई आन्तरिक मामिलामा हस्तक्षेप मान्ने गरेको छ ।
यो कानुन ब्रिटेनले चीनलाई हङ्कङ हस्तान्तरण गरेको वार्षिकोत्सवको अवसरमा बुधबारअघि नै लागु हुने बताइएको छ । चीनको नेसनल पिपल्स कंग्रेसको स्थायी समितिबाट मंगलबार र उक्त कानुन पारित भएको हो ।
अब हङ्कङको ‘बेसिक ल’ अर्थात् संविधानमा यो मंगलबार अपरान्हसम्म थपिने अपेक्षा गरिएको छ ।