स्वरोजगारले बेरोजगार सहायता रकमका साथमा पेचेक प्रोटेक्सन रकम लिन मिल्छ ?
प्रकाशित मिति : असार ५, २०७७ शुक्रबार
कोरोनाको महामारीका कारण काम गुमाएका स्वरोजगारले पनि अहिले अमेरिकामा महामारी बेरोजगारी सहायता पीयुए रकम प्राप्त गरिरहेका छन् । उनीहरुले पीयुएबाट पाउने साप्ताहिक रकमका अतिरिक्त संघीय साप्ताहिक ६ सय डलर पनि प्राप्त गरिरहेका छन् ।
तर स्वरोजगारहरु पेचेक प्रोटेक्सन प्रोग्राम अन्तरगत ऋण लिन समेत योग्य हुन्छन् । महामारी बेरोजगारी सहायता पीयुए प्राप्त गरिरहेका व्यक्तिले पेचेक प्रोटेक्सन प्रोग्राम अन्तरगत ऋण लिन मिल्छ कि मिल्दैन ? यो प्रश्न अहिले पेचिलो प्रश्नको रुपमा रहेको छ ।
१०९९ फर्म प्रयोग गरेर रकम पाएका स्वरोजगारहरु पीपीपीका लागि समेत योग्य हुन्छन् । तर दुबै सुविधाहरु एकैपटक लिन नहुने विज्ञहरु बताउँछन् । यदि बेरोजगारी विमा रकम लिइराखेको अवधिमा पीपीपी रकम प्राप्त भएमा बेरोजगारी विमा रकम दावी गर्न छाड्नुपर्ने विज्ञहरुको सुझाव छ ।
फोब्र्समा प्रकाशित एउटा लेख अनुशार पीपीपीले कभर गरेको अवधिमा बेरोजगारी सहायता रकम लिनका लागि व्यक्ति सावधान हुनुपर्ने उल्लेख छ । यदि पीपीपी रकम प्राप्त भएमा कुनै पनि स्वरोजगार व्यक्ति पीपीपीबाट प्राप्त रकममा भर परेको अवस्थामा बेरोजगारी सहायता रकम लिन नहुने सुझाव दिइएको छ ।
सामान्यतया पीपीपी रकम साढे २ महिनाका लागि हिसाब गरेर दिइने भएकाले रकम प्राप्त भएको अवधिको साढे २ महिनासम्म बेरोजगारी विमा रकम लिन नहुने कतिपय विज्ञहरुको सुझाव छ । पीपीपी ऋण पेचेकका लागि प्रयोग गर्नुपर्ने भएकाले बढी सावधानी अपनाउनुपर्ने विज्ञहरुले सुझाव दिएका छन् ।
स्वरोजगारहरुले ईकोनोमिक इन्जुरी डिजास्टर लोन ईआईडीएलका लागि समेत आवेदन दिनसक्छन् । तर पीपीपी ऋण सहायता पाएको व्यक्तिले ईआईडीएल ऋण समेत पाएमा रकम एउटै प्रयोजनमा प्रयोग नगर्न सुझाव दिइएको छ । यदि ईआईडीएल ऋण आफ्नै पेरोलबाहेक अफिसको भाडा लगायतका अन्य खर्चमा प्रयोग गरेमा व्यक्ति बेरोजगारी सहायता रकमका लागि योग्य भइरहनसक्छ । तर यसबारेमा कानुन व्यवसायी वा एकाउन्टेन्टको सल्लाह लिन सुझाव दिइएको छ ।
फोब्र्समा प्रकाशित लेख अनुशार यदि कोही व्यक्तिले बेरोजगारी सहायता रकम लिइरहेको छ र यही बीचमा पीपीपी रकम प्राप्त भएमा प्राप्त भएको अवधिले रकम नसकिंदासम्म बेरोजगारी सहायता रकम लिनु हुँदैन । तर रकम सकिएपछि भने बेरोजगारी सहायता रकमका लागि पुन योग्य हुन सकिन्छ ।
बेरोजगारी विमा रकमका साथमा पीपीपी वा ईआईडीएल ऋण लिन हुने वा नहुने भन्ने सन्दर्भमा ट्रेजरी, एसबीए वा लेबर डिपार्टमेन्टले कुनै निर्देशिका जारी गरेको छैन । यद्यपी पीपीपीका बारेमा एसबीएले भनेको छ – ‘यदि पीपीपीमा सहभागि हुने व्यक्तिले सावधानी अपनाउन जरुरी छ कि उसले राज्यबाट पाउने बेरोजगारी सहायताको योग्यतामा फरक पर्न सक्छ ।’