कामदारभिसा खारेज गर्ने योजनामा अमेरिकी राष्ट्रपति, ग्रिनकार्डमा रोक थप्न आदेशको तयारी
प्रकाशित मिति : जेष्ठ ३२, २०७७ आईतबार
अमेरिकी राष्ट्रपति डोनाल्ड ट्रम्पले एचवान बी लगायतका कामदार भिसा खारेज गर्नेबारे विचार गरिरहेको जनाइएको छ । कोरोना महामारीका कारण अमेरिकामा बेरोजगारी दर उच्च बनेको अवस्थामा ट्रम्पले कामदार भिसा केही समयका लागि खारेज गर्ने योजना बनाएका हुन् ।
वाल स्ट्रीट जर्नलले प्रकाशित गरेको रिपोर्ट अनुशार ट्रम्पले प्रस्तावित खारेजी अक्टोबर १ देखि सुरु गर्ने आर्थिकबर्षसम्म लम्बाउने योजना बनाइएको छ । त्यस्तै डेलीले प्रकाशित गरेको रिपोर्ट अनुशार यो प्रतिबन्ध कायम हुन्जेल नयाँ एचवान बी भिसा वाहकहरुलाई अमेरिकामा काम गर्न आउनमा रोक लगाइनेछ ।
एचवान बी कामदार भिसा अमेरिकाको गैर आप्रवासी भिसा हो । यो भिसामार्फत अमेरिकन कम्पनीहरुले हरेक बर्ष विदेशी कामदारहरुलाई अमेरिकामा कामका लागि ल्याउने गर्छन् । यो भिसामा आउने चीनिया र भारतीयको संख्या ठूलो रहेपनि नेपालीहरुले समेत उल्लेख्य संख्यामा यो भिसा प्राप्त गर्दै आएका छन् ।
अमेरिकामा कोरोनाको महामारीका कारण ठूलो संख्यामा एच वान बी भिसामा रहेका चीनिया र भारतीयहरुले काम गुमाइसकेका छन् । उनीहरु नयाँ काम पाउन नसक्दा स्वदेश फर्कने तयारीमा समेत रहेका छन् । ह्वाइट हाउसले भने कामदार भिसामा लगाइन लागेको रोकबारे कुनै अन्तिम निर्णय भइनसकेको जनाएको छ ।
एचवान बी भिसाका साथमा छोटो समयका लागि सिजनल कामदारलाई दिइने एच टु बी भिसामा समेत रोक लगाउन सकिने जनाइएको छ । त्यस्तै जे वान भिसामा समेत रोक लगाउनेबारे ट्रम्प प्रशासनले विचार गरिरहेको जनाइएको छ ।
अमेरिकाले मार्चको तेश्रो सातादेखि कोरोनाको महामारीका कारण आप्रवासी भिसा जारी गर्नमा कम गरेकोमा अप्रिलको तेश्रो सातापछि आप्रवासी भिसा जारी गर्नमा पूर्णत रोक लगाएको छ । यो रोक जुन २३ सम्म कायम रहनेछ । आप्रवासी भिसामा लगाइएको रोक थपिने वा नथपिनेबारे राष्ट्रपति ट्रम्पले यसैसाता आदेश जारी गर्ने अपेक्षा गरिएको छ ।