न्युयोर्क र न्युजर्सीमा अमेरिकी नागरिकता वितरण समारोह सुचारु हुने
प्रकाशित मिति : जेष्ठ ३०, २०७७ शुक्रबार
कोरोनाको महामारीका कारण न्युयोर्क र न्युजर्सीमा रोकिएका अमेरिकी नागरिकता वितरण तथा सपथग्रहण समारोहहरु सुचारु हुने भएका छन् । मार्चको दोश्रो सातापछि सपथ लिनका लागि मिति तोकिएका तर लिन नपाएकाहरुलाई प्राथमिकतामा राखिने युएससीआईएसले जनाएको छ ।
अत्यन्तै साना साना समुहमा सामाजिक दुरी कायम गरेर त्यस्तो सपथग्रहण र नागरिकता वितरण समारोहहरु गरिने भएका छन् । न्युजर्सीमा आजदेखि नागरिकता वितरण समारोह सुरु गरिएको छ भने न्युयोर्कमा सोमबारदेखि गरिने भएको छ ।
कोरोनाको लक्षण नभएका, कोरोना संक्रमितको संसर्गमा नआएका र सेल्फ क्वारेन्टाइनमा बस्न नभनिएकाहरुलाई मात्र नागरिकता वितरण समारोहमा सहभागी गराइने युएससीआईएसले जनाएको छ । समारोहमा सहभागी हुन नसक्नेहरुलाई अर्को मिति प्रदान गरिने भएको छ ।
बन्द रहेको अवधिमा पनि युएससीआईएसले आवेदनबारे निर्णय गर्ने, अनलाइन आवेदनहरु स्वीकार गर्ने र व्यक्तिको आवश्यकताका आधारमा अत्यावश्यक सेवाहरु प्रदान गर्ने गर्दै आएको छ । न्युयोर्क र नेवार्कका युएससीआईएस अफिसहरु ग्रिनकार्डका अन्तरवार्ता, नागरिकताका अन्तरवार्ता लगायत अन्य व्यक्ति उपस्थीत हुनुपर्ने सेवाका लागि खुलिसकेका छैनन् । तर ८०० ५७३ ०८६६ मा फोन गरेर अप्वाइन्टमेन्ट लिनेहरुका लागिमात्र इमर्जेन्सी सेवा उपलब्ध हुनेछ ।
यसैबीच न्युयोर्कको एसाइलम अफिसमा सोमबारदेखि एसाइलमका अन्तरवार्ताहरु सुचारु गरिने भएको छ । तर नेवार्कको एसाइलम अफिसमा भने आन्तरिक समस्याका कारण एसाइलमका अन्तरवार्ताहरु तत्काल सुचारु नगरिने भएको छ ।
