पढाइ र घर खर्च जुटाउन म्यादी प्रहरी बन्दै महिला

प्रकाशित मिति : चैत्र २२, २०७३ मंगलबार

ठाकुरबाबा नगरपालिका–४ की २१ वर्षीया दुर्गा सावदको इच्छा सानैदेखि नेपाल प्रहरी वा सेनामा जागिर खाएर देशको सेवा गर्ने इच्छा थियो ।

कक्षा ८ पास गरेर पढाइ बिट मारेकी दुर्गाले सानैदेखिको धोको पूरा गर्ने गत वर्ष नेपाल प्रहरीमा आवेदन दिइन् । छनोटका विभिन्न चरण पार गरेकी दुर्गाले अन्तिममा आएर लिखित परीक्षा पास गर्न सकिनन् ।

स्थानीय तह चुनावका लागि आह्वान गरिएको म्यादी प्रहरीमा आवेदन दिन सदरमुकाम आएकी दुर्गाले भनिन्, “प्रहरी हुने सानैदेखिको इच्छा हो । पहिलोपटक असफल भएँ । प्रहरी नै हुन नसके पनि यसपालि म्यादी प्रहरी बन्ने धोको छ ।” उनीजस्तै धेरै महिला यतिखेर म्यादी प्रहरीको लाइनमा छन् । सामान्य लेखपढ गरेका मात्र होइन, स्नातक तह पढ्दै गरेका युवती र गृहिणीको म्यादी प्रहरी बन्ने धोको छ । महिलामध्येमा पनि थारु महिला बढी छन् । म्यादी प्रहरीको कमाइले पढाइ खर्च जुट्ने र घरखर्च पनि चलाउन सजिलो हुने उनीहरूको भनाइ छ । सदाशिव बहुमुखी क्याम्पस मगरागढीमा स्नातक प्रथम वर्षमा पढ्दै गरेकी आशाकुमारीले म्यादी प्रहरीको कमाइले पढाइ खर्च जुट्ने हुनाले म्यादीमा भर्ना हुन आएको बताइन् ।

“यतिखेर समय खाली छ । फुर्सद छ । समयको पनि सदुपयोग हुने, पढाइ खर्च पनि जुट्ने भएकाले म्यादी बन्ने इच्छा जागेको हो,” उनले भनिन् । विगतमा घरायसी काममा मात्र सीमित रहने महिला आजभोलि सामाजिक काम तथा अन्य क्षेत्रमा सक्रिय देखिनुले महिलाको चेतनास्तर बढ्दै गएको महिला अधिकारकर्मी बताउँछन् ।

सरकारले म्यादी प्रहरीलाई सेवा सुविधा पनि राम्रै दिएकाले पनि यसमा आर्कषण बढेको महिला बताउँछन् । अघिल्ला निर्वाचनमा म्यादीका लागि महिलाले खासै चासो देखाउँदैन्थे । यसपालि भने बढी आकर्षित छन् । अनुभव पनि हुने र कमाइ पनि हुने भएकाले आफूहरू आकर्षित भएको महिला बताउँछन् । म्यादीको अनुभवले सेना प्रहरीमा जागिर खान सजिलो हुने धेरैको बुझाइ छ ।

जिल्ला प्रहरी कार्यालय बर्दियाका अनुसार म्यादीका लागि एक हजार १२७ महिलाले आवेदन दिएका छन् भने पुरुष चार हजार सात रहेको प्रहरी उपरीक्षक भरतबहादुर बोहराले जानकारी दिनुभयो । प्रहरी उपरीक्षक बोहराका अनुसार एक हजार ११२ जनालाई म्यादीमा छनोट गरिने छ ।
म्यादी प्रहरीले तालिम लिएपछि नेपाल प्रहरीको जवानसरह तलब, पोसाक र रासन पाउनेछन् ।

 

KHASOKHAS EDITORIAL TEAM

Editor-in-Chief : Kishor Panthi
Deputy Editor-in-Chief : Ashmita Khadka
Executive Editor : Anil Adhikari
English Editor: Rajan Thapaliya
Editor: Deepak Pariyar
Editor (Business/US Politics) : Suresh Shahi
Multimedia Editor/Presenter : Kiran Marahatta
Europe Editor: Hari Krishna Panthi
Online Editors: Suraj Ghimire, Bikram Khatri, Aashish Khanal, Dikshya Panthi
Chief Photographer: Dipendra Dhungana
Editor (Empowerment) : Sapana Pariyar
© 2021 KHASOKAHS. All Rights Reserved. Namaste International Media Group (worldwide) and Namaste Media Inc (USA)
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com