पूर्वसचिव भीम उपाध्याय पक्राउ
प्रकाशित मिति : बैशाख १०, २०७७ बुधबार
सरकारका पूर्वसचिव भीम उपाध्याय पक्राउ परेका छन् ।ललितपुरको कुसुन्तीमा रहेको निवासबाटै प्रहरीले उनलाई बुधबार साँझ पक्राउ गरेको हो ।
उपाध्यायले फेसबुक र ट्विटरबाट अफवाह फैलाउने गरी प्रचारबाजी गरेकाले पक्राउ गरिएकाे बताइएकाे छ । पछिल्लो समय उपाध्यायले सामाजिक सञ्जालबाट सरकारको तीव्र आलोचना गर्दै आएका छन् ।
उपाध्यायको केही दिनअघि स्वास्थ्य मन्त्रालयका सचिव यादव कोइरालासँग सामाजिक सञ्जालमा गालीगलौजकै शैलीमा वादविवाद पनि गरेका थिए । पछिल्लो समय उनले प्रधानमन्त्री केपी शर्मा ओलीविरुद्ध नै टिप्पणी गर्दै आएका थिए ।
साइबर अपराधको कसुरमा आज काठमाडौं जिल्ला अदालतमा उपाध्यायलाई उपस्थित गराइने प्रहरी स्रोतले जनाएको छ।