Follow @khasokhasmag

नयाँ शक्तिले भोलि देशभरका जिल्ला निर्वाचन कार्यालय घेराउ गर्ने


प्रकाशित मिति : चैत्र २०, २०७३ आईतबार

नयाँ शक्ति पार्टी, नेपालले भोलि (सोमबार) ७५ वटै जिल्लाका निर्वाचन कार्यालयहरुमा धर्ना दिने भएको छ । नयाँ शक्ति पार्टीलगायत अन्य चुनाव चिन्ह नपाएका दलहरुले संयुक्त रुपमा आज (आइतबार) शान्तिपूर्ण रुपमा काठमाडौंस्थित निर्वाचन आयोगमा धर्ना दिँदा धर्नास्थलबाटै संयोजक डा. बाबुराम भट्टराईसहित नयाँ शक्ति तथा अन्य पार्टीका नेताहरुलाई गिरफ्तार गरेकोप्रति भत्र्सना गर्दै शीघ्र रिहाइ अनि दलीय चुनाव चिन्हको माग गर्दै भोलि बिहान निर्वाचन कार्यालय घेराउ गर्ने जनाएको छ ।

निर्वाचन आयोगमा विधिवत ंरुपमा दर्ता भएको नयाँ दललाई संविधानप्रदत्त पाउनुपर्ने दलीय चुनाव चिन्ह पाउने अधिकारबाट बञ्चित गर्दै हाल संसदमा प्रतिनिधित्व गर्ने दलहरुलाई मात्र चुनाव चिन्ह दिने कानूनी व्यवस्था सरकारले गरेको छ । नयाँ दललाई आफ्नो दलीय चुनाव चिन्हबाट वञ्चित गर्ने गरी जारी भएको स्थानीय तह निर्वाचन ऐन २०७३ को सो व्यवस्था संशोधनका लागि दवाव दिन भन्दै आइतबार काठमाडौंस्थित निर्वाचन आयोगमा धर्ना दिएको थियो ।

यसैबीच गिरफ्तारपश्चात् प्रहरी हिरासतमा रहनुभएका पूर्वप्रधानमन्त्री एवं पार्टीका संयोजक डा. भट्टराईले जबसम्म यो सरकारले दलीय चुनाव चिन्ह दिंदैन र चुनावको वातावरण सुनिश्चित गर्दैन, त्यतिबेलासम्म आफूहरुको आन्दोलन जारी रहने बताउँदै हिरासतमै धर्ना बस्नुभएको छ ।

संयोजक भट्टराईलाई उधृत गर्दै उहाँका निजी सचिव विश्वदिप पाण्डेले भन्नुभयो – ‘निर्वाचनमा जानका लागि दलीय चुनाव चिन्ह पाउनु पर्ने आफ्नो मुख्य माग रहेको र सो माग पूरा नहुँदासम्म आफूहरु हिरासतमै रहेर धर्ना दिने बताउनुभएको छ ।’

आइतबार बिहान धर्ना सुरुभएलगत्तै प्रहरीले धरपकट गरी संयोजक भट्टराईसहित ५० भन्दा बढी नेताकार्यकर्ताहरुलाई गिरफ्तार गरेको थियो । सोको विरोधमा नयाँ शक्तिले भोलि पनि निर्वाचन कार्यालय घेराउ गर्ने भएको हो । व्यापक जनसहभागितासहितको निर्वाचन कार्यालय घेराउका लागि बिहान साँढे आठ बजे काठमाडौंको अनामनगरस्थित हनुमानथानमा भेला हुन आफ्ना नेता तथा कार्यकर्ताहरुलाई अपिल गरेको केन्द्रीय कार्यालयका सहसंयोजक प्रल्हाद लामिछानेले बताउनुभयो ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com