सञ्चारकर्मी गोमा को शब्दमा रहेको ‘कोरोना भाइरस’ गीत
प्रकाशित मिति : चैत्र १३, २०७६ बिहीबार
काठमाडौं । पत्रकार गोमा परियारको शब्दमा कोरोना भाईरस बोलको गीत सार्वजनिक भएको छ । कोरोना भाइरसले विश्वव्यापी महामारीको रुप लिइरहँदा त्यसविरुद्ध सचेतना अभियान पनि जारी छ । नेपालमा पनि कोरोना भाइरस संक्रमित फेला परिसकेको अवस्थामा नेपालमा पनि सचेतना अभियान उत्तिकै सघन बनेको छ । यसै सन्दर्भमा लोक तथा दोहोरी गायक नरेश खाती र गायिका एलिना चौहानको आवाजमा तथा पत्रकार परियारको शब्दमा कोरोना भाइरसविरुद्ध सचेतना गीत सार्वजनिक गरेका हुन् ।
‘डराउनैपर्ने त छैन है, ख्यालठट्टा गर्ने नि हैन है’ बोलको यो गीतमा नरेश खातीकै संगीत रहेको छ । यो गीतको एरेञ्ज विशाल निरौलाले गरेका छन् । नरेश खातीले नै निर्देशन गरेको यो म्युजिक भिडियोलाई नवीन घर्तीमगरले सम्पादन गरेका छन् । डराउन नहुने, आत्तिन पनि नहुने तर सचेत बन्नुपर्ने सन्देश यो गीतले दिएको छ । अंकमाल गर्ने र हात मिलाउने काम आजैबाट छोड्न आव्हान गर्दै गीतमा भेटघाट हुँदा नमस्कार गरेर हात जोड्न आग्रह गरिएको छ । आफ्नै आनीबानीले स्वस्थ बन्न सकिने र साबुनपानीले बेसरी हात धुनुपर्ने यो गीतमा उल्लेख छ । विपतको यो घडीमा ठग्ने र लुट्ने काम नगर्न र मानवीयताको राम्रो उदाहरण पेश गर्न भनिएको छ । कोरोनाविरुद्ध सबैले आफ्नो क्षेत्रबाट केही न केही योगदान गर्ने उद्देश्यले यो गीत सार्वजनिक गरिएको गायक नरेश खातीले बताउनु भयो । यो गीतको म्युजिक भिडियोमा कोमल वली, ऋषि धमला, दीपाश्री निरौला, बद्री पंगेनी, रमेश बिजी, पशुपति शर्मा, फुलन्देकी आमा, लट्टे र ईश्वरी खातीले अभिनय गरेका छन् ।