नेपालमा भएका सबै अमेरिकनलाई घरभित्र बस्न सुझाव, भिसा सकिन लागेकाको थप गरिने
अमेरिकी दूतावास काठमाडौंले नेपालमा भएका सबै अमेरिकनलाई घरभित्र बस्न सुझाव दिएको छ । नेपालका प्रधानमन्त्रीले मार्च २२ देखि मार्च ३१ सम्म नेपालबाट हुने सबै अन्तर्राष्ट्रिय उडानहरु रद्दको घोषणा गरेकाले यो नियम आइतबार राती १२ बजे देखि लागु हुने दूतावासले सुचित गरेको छ ।
यात्रा प्रतिबन्धका कारण अमेरिका फर्कन नसकेका अमेरिकी नागरिकका लागि नेपाल सरकारले भिसा थप गर्ने भएको भएको छ । तर भिसा सकिनुभन्दा अगाडि नै भिसा थपका लागि आवेदन दिनुपर्ने जनाइएको छ ।
स्वदेश फर्कन चाहने अमेरिकनले उडानमा प्रतिबन्ध लाग्नु अगाडि उडान भए नभएको बुझ्न एयरलाइन्सहरुलाई सम्पर्क गर्न दूतावासले सुझाव दिएको छ । यदि उडान उपलब्ध नभएको खण्डमा र नेपालमै बस्नु पर्ने भएको खण्डमा उडान सुरु नहुन्जेल घरभित्र बस्ने प्रबन्ध गर्न समेत दूतावासले सुझाव दिएको छ ।
नेपालमा रहेका सबै अमेरिकनहरुलाई दूतावासले अनलाइनमा दर्ता गराउन अनुरोध गरेको छ । यो निशुल्क सेवा रहेको र आपतकालिन अवस्थामा आफ्ना नागरिकलाई सम्पर्क गर्न सहज हुने दूतावासले जनाएको छ ।
यदि कोरोना संक्रमणको आशंका लागेमा नेपालको स्वास्थ्य मन्त्रालयका हटलाइन नम्बरहरु 9851255839, 9851255837, 9851255834 मा सम्पर्क गर्न अनुरोध गरिएको छ । अध्यागमन नीतिहरुबारे बुझ्न विमानस्थलको नम्बर +977 1-411-3045 मा सम्पर्क गर्न अनुरोध गरिएको छ । अन्य फोन इन्क्वायरीका लागि +1-888-407-4747 (अमेरिका र क्यानडाबाट) +1-202-501-4444 (विदेशबाट) मा सम्पर्क गर्न भनिएको छ ।
