जुजुभाइद्वारा जिब्रो नछेड्ने घोषणा
प्रकाशित मिति : चैत्र ११, २०७३ शुक्रबार
भक्तपुर/ बिस्केट जात्रामा मनाइने प्रसिद्ध जिब्रो छेड्ने जात्रा यस वर्ष संकटमा परेको छ । मध्यपुर थिमीको बोडेमा सयौँ वर्षअगाडिदेखि निरन्तर रूपमा सञ्चालन हुँदै आएको जिब्रो छेड्ने जात्रा यस वर्ष संकटमा परेको हो ।
आठ वर्षदेखि जिब्रो छेड्दै आएका ३८ वर्षका जुजुभाइ बाग श्रेष्ठले यस वर्ष जिब्रो नछेड्ने बताएका छन् । ‘विगत आठ वर्षदेखि मैले जिब्रो छेड्दै आएको हुँ, यस वर्ष भने मैले यो जात्रालाई निरन्तरता दिन सकिनँ, त्यसैले जिब्रो नछेड्ने निर्णय गरेँ, अब बोडेका अरू व्यक्ति जिब्रो छेड्न तयार हुनुपर्छ,’ बिहीबार आयोजित पत्रकार सम्मेलनमा उनले भने ।
विगतका वर्षमा पनि जिब्रो छेड्ने व्यक्ति तयार नहुँदा जात्रालाई निरन्तरता दिएका जुजुभाइले यस वर्ष जिब्रो नछेड्ने भएपछि अरू तयार नभए जात्रा नै रोकिने भएको छ । घरमा पारिवारिक समस्या आएको र बोडेका अरूलाई पनि जात्रालाई निरन्तरता दिन जिब्रो छेड्ने अवसर प्रदान गर्न आफूले यस वर्ष जिब्रो नछेड्ने निर्णय गरेको उनले बताए ।
जुजुभाइले जिब्रो छेड्नुअघि चार वर्ष बुद्धकृष्ण बाग श्रेष्ठ र १२ वर्ष उनका दाजु कृष्णचन्द्र बाग श्रेष्ठले जिब्रो छेडेर जात्रालाई निरन्तरता दिएका थिए ।नयाँ पत्रिका
