५५ अर्व पाइन्छ भन्दैमा एमसीसी पारित गरिँदैन : प्रचण्ड
प्रकाशित मिति : फाल्गुन १७, २०७६ शनिबार
सत्तारुढ नेकपाका अध्यक्ष पुष्पकमल दाहाल ‘प्रचण्ड’ ले ५५ अर्व रुपैयाँ पाइन्छ भन्दैमा राष्ट्रिय हित प्रतिकूल हुने गरी मिलेनियम च्यालेञ्ज कर्पाेरेशन (एमसीसी) पारित नगरिने बताएका छन् ।
‘प्रेस संगठन, नेपाल’ को सिन्धुपाल्चोक जिल्ला संगठनले सुकुटेमा आयोजना गरेको साक्षात्कार कार्यक्रममा पत्रकारहरुले राखेको जिज्ञाशाको उत्तर दिँदै प्रचण्डले उपरोक्त कुरा बताएका हुन् ।
‘एमसीसी सम्झौता संसोधन हुनै नसक्ने बाइबल होइन’ भनेर आफूहरुले लगातार भनिरहेको बताउँदै प्रचण्डले थपे, ‘एमसीसी कुनै संशोधन हुनै नसक्ने, कमा–फुलिस्टफ फेर्नै नपाइने भन्ने होइन । यो भन्दा अगाडि पनि दुई चोटि संशोधन भइसकेको छ ।’
एमसीसी सम्झौता अन्तर्गत नेपालले प्राप्त गर्ने भनिएको रकमलाई धेरै ठूलो उत्पातै ठूलो रकम हो भनेर भन्नु जरुरी नरहेको पनि उनले बताए । भने, ‘हाम्रो राष्ट्रिय हित मुख्य कुरा हो, नेपालको हितसँग ‘कन्ट्र्या्डिक्ट’ गर्ने (बाझिने) कुरा छन् भने तिनलाई परिमार्जन गर्नुपर्छ ।’
आफूहरु अमेरिकासँग सहयोग लिन र सहकार्य गर्न चाहिरहेको र लामो समयदेखि नेपालको अमेरिकासँग कुटनीतिक सम्बन्ध रहेको बताउँदै उनले अमेरिकासँग नेपालको कुनै खालको बैरभाव नरहेको पनि प्रष्ट्याए ।