अमेरिकी कामदारभिसाको अनलाइन दर्ता मार्च १ को मध्यान्हबाट, लोटरीमार्फत परिणाम मार्च ३१ मै
प्रकाशित मिति : फाल्गुन १६, २०७६ शुक्रबार
अमेरिकाको कामदार भिसा एचवान बीका लागि अनलाइनमार्फत दर्ता अवधि मार्च १ को दिउसो १२ बजेबाट सुरु हुने युएससीआईएसले घोषणा गरेको छ । पूर्वीय समय अनुशार दिउसो १२ बजेबाट दर्ता खुल्ने र मार्च २० दिउसो १२ बजेसम्म दर्ता गर्न सकिने युएससीआईएसले जनाएको छ ।
आर्थिक बर्ष २०२१ का लागि खुल्ने उक्त भिसाका लागि तोकिएको अवधिभित्र आवेदक र उनीहरुका प्रतिनिधिहरुले आवेदक र लाभग्राहीको विवरण भरेर अनलाइनमार्फत दर्ता गराउन सक्नेछन् । हरेक दर्ताका लागि युएससीआईएसले कन्फर्मेशन नम्बर उपलब्ध गराउनेछ ।
उक्त नम्बर रजिस्ट्रेशन ट्रयाक गर्ने प्रयोजनका लागि प्रयोग गर्न सकिनेछ । तर उक्त नम्बर केस नम्बर नभएका कारण युएससीआईएसको केस स्टाटस हेर्न भने प्रयोग हुनेछैन ।
आवेदक वा प्रतिनिधिले अनलाइनमार्फत दर्ता गराउनका लागि युएससीआइएसको अनलाइन एकाउन्टको प्रयोग गर्नुपर्नेछ । साथै १० डलर आवेदन शुल्कसमेत बुझाउनुपर्नेछ ।
आवेदक वा उनीहरुका प्रतिनिधिले एउटै अनलाइन सेसनमा एकभन्दा धेरैका लागि आवेदन दर्ता गराउन सक्नेछन् । अनलाइन एकाउन्टमा मार्च १ भन्दा अगाडि नै विवरणहरु भरेर ड्राफ्ट बनाएर राख्न सकिनेछ । तर दर्ता भने मार्च १ को दिउसो १२ बजेपछिमात्र गर्नुपर्नेछ ।
मार्च २० भित्र प्रयाप्त आवेदनहरु आएको खण्डमा युएससीआईएसले मार्च २० को दिउसो १२ बजे नै अनलाइन दर्ता बन्द गर्नेछ । त्यसपछि लोटरी प्रणालीबाट छनौट गरेर मार्चको ३१ सम्म छनौट भएकाहरुलाई सुचित गरिनेछ ।
त्यसपछि छनौट भएका आवेदनउपरमात्र आवेदकले एचवान बी भिसाका लागि प्रकृया अगाडि बढाउन सक्नेछन् । सबै प्रकृया पूरा गरेको खण्डमा उनीहरुले भिसा प्राप्त गर्नसक्नेछन् ।
उच्च शिक्षा प्राप्त गरेका एचवानबी कामदारका लागि यो बर्षदेखि नयाँ प्रकृयाको थालनी हुन लागेको हो ।
पहिलोपटक अमेरिकी रोजगारदाताले क्षमतावान उच्च शिक्षा प्राप्त कामदारहरुका लागि अनलाइनमार्फत रजिस्ट्रेशन गर्न पाउने भएका छन् । ब्याचलर डिग्री गरेकाहरुका लागि ६५ हजारको कोटा रहेको छ भने अमेरिकामा मास्टर्स डिग्री गरेकाहरुका लागि २० हजारको कोटा रहेको छ । तर अमेरिकामा मास्टर्स डिग्री गरेकाहरुले ६५ हजारको कोटामा समेत भाग लिन पाउनेछन् ।
यदि तपाई आवेदक हुनुहुन्छ भने अनलाइन एकाउन्ट बनाएर दर्ता गर्ने प्रकृया यो भिडियोमा हेर्नुहोला ।
यदि तपाई कानुन व्यवसायी वा प्रतिनिधि हुनुहुन्छ भने अनलाइन एकाउन्ट बनाएर दर्ता गर्ने प्रकृया यो भिडियोमा हेर्नुहोला ।
अनलाइन एकाउन्ट बनाउन र दर्ता गर्न मार्च २० सम्म नै सकिनेछ । छनौट प्रकृया दर्ता प्रकृया समाप्त भएपछिमात्र सुरु हुने भएकाले आवेदन मार्च १ मा नै पठाउन अनिवार्य नभएको युएससीआईएसले जनाएको छ ।
एचवानबी काममदार भिसाबारे थप थाहा पाउन यहाँ क्लिक गर्नुहोला ।
एउटै आर्थिक बर्षमा एउटै व्यक्तिका लागि एउटा भन्दा बढी आवेदन दिएको खण्डमा त्यस्ता आवेदनहरु स्वत अस्वीकृत हुनेछन् । तर आर्थिक बर्षमा कुनै कारणवश भिसा नम्बर बढाउनुपर्नेभएमा होल्डमा राखिएकाहरुबाट पुन छनौट गरिनेछ ।