अध्यक्ष पुष्पकमलले डोला बोक्दा हेलिकप्टरबाट पुष्पवर्षा
प्रकाशित मिति : फाल्गुन ११, २०७६ आईतबार
मैथिल बाहुल्य क्षेत्र धनुषामा हिन्दीमा भाषण गर्दै नेपाल कम्युनिष्ट पार्टी नेकपाका अध्यक्ष पुष्पकमल दाहाल प्रचण्डले मिथिला क्षेत्रको डोलालाई काँधमा उठाउनुभएको छ ।
मिथिला बिहारी नगरपालिकाको कचुरीस्थित मिथिला बिहारी मन्दिरबाट भजन, किर्तनसहित डोला निकालिँदा प्रचण्डले केही दुरीसम्म डोलालाई बोक्नुभएको हो ।
उहांले मिथिला मध्यपरिक्रमामा निकालिने डोला संस्कृतिको प्रशंसा समेत गर्नुभयो । त्यसअघि आयोजित औपचारिक कार्यक्रमलाई अध्यक्ष प्रचण्डले हिन्दी भाषामा सम्बोधन गर्नुभयो ।
उहांले नेपालीसहित भारतीय हिन्दु धर्माम्बलीले निकाल्ने मध्यपरिक्रमाको ठूलो महत्व रहेको बताउनुभयो । उहांले मिथिला बिहारी मन्दिरमा धर्मशाला निर्माणमा सहयोग गर्ने बचनसमेत दिनुभएको छ ।
आफू प्रधानमन्त्री हुँदा मिथिला मध्यपरिक्रमालाई केही सहयोग गर्ने अवसर मिलेको बताउँदै उहांले अब मिथिला बिहारी परिषद् गठनको पहल गर्ने प्रतिबद्धता जनाउनुभएको छ । डोला निकाल्ने क्रममा प्रचण्ड आएको मनाङ्ग एयरको हेलिकप्टरबाट पुष्पवृष्टिसमेत गरिएको थियो ।