एमसीसी कार्यदलले ओली–प्रचण्डलाई बुझायो प्रतिवेदन : यस्तो छ सुझाव
प्रकाशित मिति : फाल्गुन ९, २०७६ शुक्रबार
सत्तारुढ नेपाल कम्यनिष्ट पार्टी नेकपा को केन्द्रीय कमिटीले गठन गरेको अमेरिकी नियोग मिलेनियम च्यालेन्ज कर्पोरेसन एमसीसी अध्ययन कार्यदलले आफ्नो प्रतिवेदन बुझाएको छ । सत्तारुढ नेपाल कम्यनिष्ट पार्टी नेकपा को केन्द्रीय कमिटीले गठन गरेको एमसीसी अध्ययन कार्यदलले प्रधानमन्त्री निवास बालुवाटारमा कार्यदलका संयोजक झलनाथ खनालले पार्टी अध्यक्षद्वय केपी शर्मा ओली र पुष्पकमल दाहाल, प्रचण्डलाई प्रतिवेदन बुझाउनु भएको हो ।
कार्यदलले सरकार र एमसीसीबीच भएको सम्झौता र इण्डो प्यासिफिकका सम्बन्धमा आवश्यक तथ्यहरुको विस्तृत अध्ययन गरेर प्रतिवेदन बुझाएको हो । प्रतिवेदनमा केही बिषयमा प्रष्ट हुनुपर्ने आवश्यकता औल्याएको छ । कार्यदललाई १० दिनभित्र प्रतिवेदन बुझाउने समयसीमा दिइएको थियो । तर, कार्यदलले तोकिएको समयमा प्रतिवेदन बुझाउन नसकेपछि थप १० दिनको समय पाएको थियो ।
नेकपा केन्द्रीय कमिटीको गत माघ १५ देखि १९ गतेसम्म बसेको बैठकले वरिष्ठ नेता खनाल संयोजकत्वमा परराष्ट्रमन्त्रीसमेत रहनुभएका स्थायी कमिटी सदस्य प्रदीप ज्ञवाली र अर्का स्थायी कमिटी सदस्य भीम रावल सदस्य रहनुभएको कार्यदल बनाएको थियो ।खनाल कार्यदलले एमसीसी अस्वीकार गर्नुपर्ने सुझाव भने दिएको छैन । कार्यदलले प्रतिवेदन बुझाएपछि अब एमसीसीका सम्बन्धमा नेकपाले थप निर्णय गर्नेछ ।