नेपालीलाई हवाईमार्गबाट भारत जाँदा आउँदा नागरिकताको साटो पासपोर्ट प्रयोग गर्न प्रोत्साहन
प्रकाशित मिति : फाल्गुन ५, २०७६ सोमबार
अब नेपालीलाई हवाईमार्गबाट भारत जाँदा र भारतबाट नेपाल आउँदा पनि पासपोर्ट प्रयोग गर्न प्रोत्साहन गरिएको छ । नागरिकतामा एराइभल र डिपार्चर स्टाम्प लगाउन असम्भव रहेको र यसबारेको रेकर्ड पद्धतिसमेत प्रभावकारी नभएका कारण अब आवागमनमा पासपोर्ट प्रयोगका लागि यात्रुलाई प्रोत्साहित गरिने अध्यागमनका अधिकारीले बताएका छन् ।
स्थलमार्गबाट भारत पुगेर त्यहाँको विमानस्थल प्रयोग गरी तेश्रो मुलुक जान नपाइने नियम कार्यान्वयनसँगै पासपोर्ट प्रयोगका लागि प्रोत्साहन गरिएको हो ।
मध्यपूर्वका साउदी अरब, कतार, कुवेत, संयुक्त अरब इमिरेट्स लगायत ९ वटा देशहरुमा भारतीय विमानस्थल प्रयोग गरेर उड्नका लागि नेपाल सरकारले रोक लगाएको तर वैदेशिक रोजगार विभागको श्रम स्वीकृतिको स्टीकर लगाएर आएका नेपालीहरुलाई दूतावासबाट जारी नो अब्जेक्सन लेटरबाट उड्न पाउनेछन् । तर अरु सबै देशहरुका हकमा राहदानीमा भारतीय अध्यागमनबाट भारत प्रवेश गरेको छाप लगाउनु अनिवार्य भएको दिल्ली स्थीत नेपाली दूतावासले जारी गरेको वक्तब्यमा जनाइएको छ ।
खुला सिमानाको दुरुपयोग गर्दै मानव तस्करी समेत हुनेगरेको भन्दै नेपाली नागरिकको प्रस्थान अनुमति सम्बन्धमा नेपालको अध्यागमन विभागले स्थलमार्गबाट भारत जाने नेपाली नागरिकको पासपोर्टमा प्रस्थान छाप नदिने र नलगाउने व्यवस्था कार्यान्वयन गर्न निर्देशन दिइसकेकाले अब नेपाली पासपोर्टवाहकले स्थलमार्गबाट भारत गई भारतीय विमानस्थलको प्रयोग गरेर तेश्रो मुलुक जान नपाउने भएका छन् ।
स्थलमार्गबाट जाँदा नेपालको अध्यागमन कार्यालयले प्रस्थान छाप नलगाउने भएपछि उनीहरुको पासपोर्टमा भारतीय अध्यागमन विभागले समेत आगमन छाप नलगाउने भएको छ । जसका कारण उनीहरुलाई भारतीय विमानस्थलको प्रयोग गरी उड्न नदिइने भएको छ ।
नेपालबाट स्थलमार्ग प्रयोग गरी तेश्रो मुलुक उडान गर्न खोज्दा आइपर्ने समस्याबाट बच्नका लागि नेपाली नागरिकलाई काठमाडौंस्थीत अन्तर्राष्ट्रिय विमानस्थलबाट उडान गर्न विशेष अनुरोध गरिएको छ ।
नो अब्जेक्सन लेटर केबल साउदी अरेबिया, कतार, कुवेत, युनाइटेड अरब इमिरेट्स, ओमन, बराइन, इराक, लिबिया र लेबनानका सन्र्दभमा मात्र श्रम स्वीकृति सहित जानेहरुका हकमा जारी हुनेछ । अरु सबैले तेश्रो मुलुक जाँदा नेपालकै विमानस्थल प्रयोग गर्नुपर्नेछ ।
भारतीय विमानस्थलमा अवतरण गरेर स्थलमार्गहुँदै नेपाल जाने र स्थलमार्ग हुँदै भारतीय विमानस्थलमा आएर अमेरिका आउने नेपालीहरु समेत ठूलो संख्यामा रहेका छन् । खासगरी भारतसँग सिमा जोडिएका क्षेत्रका र अमेरिकामा एसाइलम गरेका नेपालीहरुले यो विधि अपनाउँदै आएका छन् । तर अब भने स्थलमार्गबाट भारत आएर भारीतय विमानस्थलबाट अमेरिका वा तेश्रो मुलुक आउन पाइने छैन ।