ग्रिनकार्डका लागि १३ हजार तिरेर नक्कली विवाह गरेका श्रेष्ठलाई जरिवाना र जेल
प्रकाशित मिति : फाल्गुन २, २०७६ शुक्रबार
ग्रिनकार्डको लागि १३ हजार डलरमा नक्कली विहे गरेको अभियोगमा अमेरिकामा फन्दामा परेका नेपाली इलोभ श्रेष्ठलाई १ महिनाको जेलसजाय , २ बर्षको प्रोबेशन र ४ हजार डलर जरिवानाको सजाय दिइएको छ ।
उनले गत जुलाईमा आफूले गरेको अपराध अदालतसमक्ष स्वीकार गरेपनि अहिले उनको सजाय सुनाइएको हो । अमेरिकी अदालतमा बयान दिदै २९ बर्षका श्रेष्ठले ग्रिनकार्डको लोभमा एक महिलालाई मोटो रकम तिरेको स्वीकार गरेका थिए ।
उनी अहिले ५ हजार डलर जमानतमा रिहा भएका छन् । तर उनले आगामी फरबरी २६ मा जेलमा हाजिर भएर एकमहिनाको जेल सजाय काट्नुपर्ने भएको छ । एकबर्षको जेलसजाय पूरा भएपछि उनलाई २ बर्षका लागि निगरानीमा छाडिने भएका छन् । श्रेष्ठले अमेरिकामा बस्न र काम गर्न भने पाउने भएका छन् ।
मैनमा रहेको बैंगोरको अदालतमा न्यायाधिस लेन्स वाकरले श्रेष्ठलाई मिहिनेती शिक्षित भएपनि जानजान गैरकानुनी बाटो रोजेको बताएका थिए । श्रेष्ठले न्यायाधिस समक्ष माफी माग्दै क्यालिफोर्नियामा आमाको खोलेको रेष्टुरेण्ट आफू नभए बन्द गर्नुपर्ने भएकाले जेलको साटो प्रोवेशन मागेका थिए ।
श्रेष्ठ टीपीएसमा रहेका कारण तत्काल अमेरिकाबाट देशनिकालाको सामना भने गर्नु नपर्ने भएको छ । तर भविश्यमा उनले देशनिकालाको सामना गर्नसक्ने जनाइएको छ ।
क्यालिफोर्निया निवासी इलोभ श्रेष्ठले सन् २०१८ मा एकजना महिलालाई १३ हजार डलर तिर्ने गरी विहे गरेको भन्दै अदालतमा मुद्दा चलेको थियो । श्रेष्ठबिरुद्ध मुद्दा दायर गरिएपछि गतबर्षको जनवरीमा उनलाई पक्राउ गरिएको थियो ।श्रेष्ठ ६ महिनाको भिजिटर भिसामा सन् २०१५ मा अमेरिका आएका थिए ।
होमल्याण्ड सेक्युरिटीको अनुसन्धानबाट २८ बर्षकी मरिना मुसेरो नामकी महिलाले विवाहसम्बन्धी वेवसाइटमा रकम तिरेर ग्रिनकार्डका लागि विवाह गर्न चाहने व्यक्ति खोजेको भन्दै विज्ञापन हालेकी थिइन् ।
त्यसपछि श्रेष्ठले उनलाई इमेलमार्फत सम्पर्क गरेको र श्रेष्ठले १३ हजार डलर तिर्ने सहमति भएपछि उनीहरुबीच विवाह भएको थियो । अदालती कागजात अनुशार श्रेष्ठले मुसेरोलाई ३ हजार डलर तिरेका थिए ।
मुसेरोले भने यसअगाडि नै अदालतसमक्ष जालसाजी विवाहको आफ्नो अपराध स्वीकार गरिसकेकी छिन् । उनलाई पनि ५ बर्षको प्रोबेशन तोकिएको थियो ।