लुम्बिनी प्रादेशिक अस्पतालका सटरमा डोजर चल्यो
प्रकाशित मिति : माघ २३, २०७६ बिहीबार
लुम्बिनी प्रादेशिक अस्पतालले विहिबार अस्पतालसँग सटेर रहेका सटरहरुमा डोजर चलाएको छ । नेपाल प्रहरी तथा शसस्त्र प्रहरीहरुको बाक्लो उपस्थितीमा कडा सुरक्षाका बीच विहान ७ बजेदेखि सटर भत्काउने काम सुरु भएको हो । लामो समयदेखि अस्पतालको सटर भत्काउने बारे अन्यौल रहेको अवस्थामा जिल्ला अदालत रुपन्देहीले आईतबार एक आदेश जारी गर्दै सटर भत्काउनका लागि बाटो खाली गरेको थियो । अदालको आदेशसँगै अस्पताल प्रशासनले व्यवसायीहरुलाई सटर खाली गर्नका लागि दिएको ४८ घण्टाको अल्टिमेटमको समय गएराती मध्य १२ बजे सकिएको थियो ।
यस अघि अस्पतालको सटर भाडामा लिएर व्यवसाय सन्चालन गर्दै आएका व्यवसायीहरुलाई ३ महिना भित्र सटर खाली गर्न सूचना जारी गरिएपछि व्यवसायीहरु त्यस बिरुद्ध जिल्ला अदालत रुपन्देहीमा गएका थिए । व्यवसायीहरुले अस्पताल प्रशासनको विरुद्ध मुद्दा दायर गरेपछि अदालतले गत मंसिर १३ गते विपक्षका नाममा निवेदकहरुलाई करार सम्झौता अनुसार भाडाका पसलबाट नउठाउनु भनि अन्तरकालिन आदेश जारी गरेको थियो । अदालतले आईतबार यस अघि आफैले दिएको अन्तरकालिन आदेशलाई खारेज गरिदिएपछि अस्पताललाई बाटो खुलेको हो ।
केहि सञ्चार माध्यममा सर्वोच्च अदालतले अस्पतालका सटर व्यवसायी र अस्पताल प्रशासन समेतका विपक्षीलाई फागुन १ गते छलफलका लागि बोलाएको समाचारहरु सार्वजनिक भएपनि अस्पताल प्रशासनलाई आधिकारी पत्र भने प्राप्त नभएको अस्पतालले जनाएको छ ।