सरकारी सुविधा लिने सम्भावना हुनेलाई ग्रिनकार्डमा कडाई गर्न १२ प्रकारका फर्म अपडेट
प्रकाशित मिति : माघ २२, २०७६ बुधबार
सरकारी सुविधा लिनेलाई ग्रिनकार्डमा कडाई गर्ने नियम कार्यान्वयनका लागि युएससीआईएसले ६ श्रेणीका १२ वटा फर्महरु अपडेट गरेको छ । यी फर्महरु यही फरबरी २४ पछि लागु हुने युएससीआईएसले जनाएको छ ।
फरबरी २४ सम्म फर्मका पुरानै संस्करणहरु प्रयोग गर्न सकिने भएतापनि त्यसपछि भने फर्मका नयाँ संस्करण प्रयोग गर्नुपर्नेछ । अन्यथा आवेदन स्वत अस्वीकृत हुने युएससीआईएसले जनाएको छ ।
गैरआप्रवासीका कामदारका लागि भरिने फर्म आई १२९ र आई १२९ सीडब्लु फर्म अपडेट गरिएको छ । त्यस्तै ग्रिनकार्डको फर्म आई ४८५, आई ४८५ पुरक ए र आई ४८५ जे फर्म पनि अपडेट गरिएको छ ।
त्यस्तै गैर आप्रवासी भिसा थप्ने फर्म आई ५३९ र आई ५३९ ए पनि अपडेट गरिएको छ । वेभर फर्म आई ६०१, स्पोन्सर फर्म आई ८६४ , आई ८६४ ए र आई ८६४ ईजी पनि अपडेट गरिएको छ । त्यस्तै शुल्क मिनाहाका लागि भरिने फर्म आई ९१२ पनि अपडेट गरिएको छ ।
त्यस्तै पब्लिक चार्जको सम्भावना हुने भएकाहरुले ग्रिनकार्ड आवेदन दिंदा फर्म आई ९४४ भरेर आत्मनिर्भरताको घोषणा गर्नुपर्नेछ । यदि युएससीआईएसले पब्लिक चार्जको सम्भावना भएकालाई धरौटी राख्न भनेको खण्डमा भने धरौटी फर्म आई ९४५ पनि भर्नुपर्नेछ । पब्लिक चार्ज धरौटी रद्द गराउनका लागि भने फर्म आई ३५६ फर्म भर्नुपर्नेछ ।
शरणार्थीहरु, एसाइलम गरेकाहरु, हिंशाको शिकार भएकाहरुलाई भने पब्लिक चार्जको नियम लागु नहुने जनाइएको छ । अहिलेका लागि इलिनोयबाहेकका सबै ४९ राज्यमा नयाँ नियम लागु भएको छ । इलिनोयमा भने संघीय अदालतले पब्लिक चार्जको नियम कार्यान्वयनमा रोक लगाएको छ । उक्त रोक हटाइएको खण्डमा भने त्यसबारे युएससीआईएसले छुट्टै सुचना जारी गर्नेछ ।
युएससीआईएसले पब्लिक चार्जको नियम कार्यान्वयनका लागि छुट्टै निर्देशिका पनि जारी गरेको छ ।