अमेरिकाबाट गल्तीले देशनिकालामा परेका अमेरिकी नागरिक अमेरिका फिर्ता
प्रकाशित मिति : माघ २१, २०७६ मंगलबार
अमेरिकाबाट गल्तीले देशनिकालामा परेका एक अमेरिकी नागरिक अमेरिका फिर्ता भएका छन् । सुरुमा अमेरिकामा शरणार्थी बनेर आएका कम्बोडियाका सोक लुएन झण्डै ५ बर्ष अगाडि अमेरिकाबाट देशनिकाला भएका थिए । झण्डै ५ बर्ष कम्बोडियामा बिताएका उनी सान फ्रान्सिस्को आएका छन् ।
उनलाई पुरानो एउटा लागुऔषधको मामलामा सीबीपीले देशनिकालाको प्रकृया सुरु गरेको थियो । तर उनी झण्डै २ दशकदेखि नै अमेरिकी नागरिक रहदै आएका थिए । जुनकुरा देशनिकाला हुने सोक लुएनलाई पनि थाहा थिएन ।
जब उनलाई सीबीपीले देशनिकालाको प्रकृयामा राखेको थियो, तब उनले आफै अमेरिका छाडेका थिए । अमेरिकामा गल्तीले देशनिकालामा राखिएकाहरुमा कम्बोडियाबाट फर्किने उनी तेश्रो व्यक्ति भएका छन् ।
उनलाई सान फ्रान्सिस्कोका विमानस्थलमा स्वागत गर्न परिवारका सदस्यसहित ७५ जना पुगेका थिए । सन् २०१५ मा उनी अमेरिका आउन खोज्दा अमेरिका प्रवेश नदिई हिराशतमा राखिएको थियो । सीबीपीले उनको ग्रिनकार्ड जफत गरेर उनलाई एउटा गाँजा सम्बन्धि अपराधमा देशनिकालाको प्रकृयामा राखेको थियो ।
अमेरिकी अध्यागमन कानुन अनुशार विदेशमा जन्मेका अमेरिकी नागरिकताप्राप्त व्यक्तिका १८ बर्ष मुनीका छोराछोरीहरु स्वत अमेरिकी नागरिक हुने प्रावधान छ । यदि बुबाआमामध्ये एकजनाले अमेरिकी नागरिकता प्राप्त गरेको खण्डमा पनि १८ बर्ष मुनीका उनीहरुका छोराछोरीहरु जहाँ भएपनि अमेरिकी नागरिक हुने प्रावधान छ ।
यही प्रावधान अनुशार उनी अमेरिकी नागरिक बनेका थिए । तर त्यो उनी आफैलाई पनि थाहा थिएन । उनकी आमा सन् १९९६ मा अमेरिकी नागरिक बनेकी थिइन्, जतिबेला उनी १८ बर्ष पुगेका थिएनन् ।