परिवारमा आधारित ग्रिनकार्डका लागि आई १३० फाइलमा भोलिदेखि केही परिवर्तन
प्रकाशित मिति : माघ १७, २०७६ शुक्रबार
परिवारमा आधारित ग्रिनकार्डका लागि फाइल गरिने आई १३० आवेदनका सन्दर्भमा भोलिदेखि युएससीआईएसले केही परिवर्तन ल्याउन लागेको छ । अमेरिकी ग्रिनकार्ड वाहक वा नागरिकले आफ्ना परिवारका सदस्यहरुको ग्रिनकार्डका लागि आई १३० आवेदन दिनसक्ने प्रावधान रहेको छ ।
भोलिदेखि लागु हुनेगरी युएससीआईएसले आई १३० का घरेलु आवेदनहरु उपरमात्र कारवाही गर्ने भएको छ । अतर्राष्ट्रिय रुपमा आई १३० आवेदन प्रकृयामा लैजानुपरेमा त्यस उपर अमेरिकी सरकारको विदेशमन्त्रालय अन्तरगत कारवाही गरिने भएको छ ।
विगतमा युएससीआईएसका अन्तर्राष्ट्रिय कार्यालयहरु नभएका स्थानमा जसरी अमेरिकी विदेशमन्त्रालयले आई १३० आवेदनहरु हेर्ने गथ्र्यो त्यसरी नै अब अन्तर्राष्ट्रिय रुपमा दिइएका सबै आवेदनहरु अमेरिकी विदेशमन्त्रालय अन्तरगत नै हेरिने भएको छ । आई १३० आवेदनबाहेक युएससीआईएसका अन्य कामकारवाही पनि अन्तर्राष्ट्रियरुपमा अमेरिकी विदेशमन्त्रालयले गर्ने भएको छ ।
अमेरिकाकी सैन्य क्षेत्रमा कार्यरतहरुले आफ्ना परिवारका सदस्यहरुका लागि विदेशमा रहेका अमेरिकी दूतावासमार्फत आई १३० आवेदन फाइल गर्नसक्ने प्रावधान रहेको छ । त्यस्तै कन्सुलर प्रकृयाका लागि मापदण्ड पूरा गरेका अन्य केही आवेदकहरुले समेत यसरी फाइल गर्न पाउने प्रावधान रहेको छ ।
युएससीआईएसले आफूलाई आधुनिकिकरण र प्रभावकारी बनाउने योजना अनुरुप अन्तर्राष्ट्रिय रुपमा आई १३० आवेदनको जिम्मा विदेश मन्त्रालयलाई दिने भएको युएससीआईएसले जनाएको छ । हालैमात्र युएससीआईएसले आई १३० आवेदन अनलाइनमार्फत समेत दिनसकिने व्यवस्था गरेको छ । जस अन्तरगत आवेदक अमेरिकाभित्र वा बाहिर जहाँ भएपनि अनलाइनमार्फत आवेदन दिनसक्छन् ।
अनलाइनमार्फत समेत आवेदन दिंदा आवेदक र लाभग्राही दुबैको समय र पैसाको समेत बचत हुने गर्छ । साथै अनलाइनमार्फत आवेदन दिंदा सबै रेस्पोन्स अनलाइनमार्फत नै गर्न सकिन्छ भने शुल्क पनि अनलाइन मार्फत नै तिर्न सकिन्छ । विदेशमा रहेका आवेदकले अनलाइनमार्फत फाइल गर्न नचाहेको खण्डमा युएससीआईएसको डलास लकबक्समा जानेगरी कागजी रुपमा पनि फाइल गर्न सक्छन् ।
प्राकृतिक विपत्तिको शिकार भएका वा अमेरिकी सेनामा कार्यरत बाहेक अन्य अमेरिकी नागरिकसमेत अमेरिकी विदेश मन्त्रालय अन्तरगत आई १३० फाइल गर्न योग्य हुनसक्छन् । तर त्यसका लागि युएससीआईएसको नीतिमा तय गरिएका योग्यताका मापदण्डहरु पूरा गरेको हुनुपर्छ ।