अमेरिकामा एसाइलम गर्नेलाई मेक्सिको फिर्ता पठाउने नीति थप देशका लागि, यी हुन् ४२ देश
प्रकाशित मिति : माघ १५, २०७६ बुधबार
अमेरिकी सरकारले विना भिसा अमेरिकी सिमाक्षेत्रमा आएर एसाइलम गर्नेलाई मेक्सिको फिर्ता पठाउने नीति थप देशका लागि विस्तार गरेको छ । आजदेखि अमेरिकी सरकारले ब्राजिलका नागरिकहरुलाई पनि एसाइलमको अदालती सुनुवाई सम्मका लागि मेक्सिको फिर्ता पठाउन सुरु गरेको छ ।
अमेरिकी सिमाक्षेत्रमा आएर एसाइलम दावी गर्ने ब्राजिलियनहरुको संख्या गतबर्ष तीनगुणाले बढेको अमेरिकी सरकारले जनाएको छ । माइग्रेन्ट प्रोटेक्सन प्रोटोगल नामको यो कार्यक्रम अमेरिकी सरकारले सन् २०१९ को जनवरीबाट सुरु गरेको हो ।
गत नोभेम्बरसम्म अमेरिकी सरकारले ५९ हजार २ सय ४१ आप्रवासीहरुलाई एसाइलमको अदालती सुनुवाईसम्मका लागि मेक्सिको फिर्ता पठाएको छ । नेपालीहरुलाई भने मेक्सिको फिर्ता पठाइएको छैन ।
हेर्नुहोस् कुन देशका कतिजनालाई फिर्ता पठाइयो
एमपीपी कार्यक्रम अन्तरगत मेक्सिको फिर्ता पठाइएकाहरुमा होण्डुरसका सबैभन्दा धेरै २१ हजार ७८६ रहेका छन् भने दोश्रोमा ग्वाटेमालाका नागरिकहरु रहेका छन् । गतबर्ष ४२ देशका नागरिकहरुलाई यो कार्यक्रम अन्तरगत मेक्सिको फिर्ता पठाइएको छ, जसमा ७२ जना मेक्सिकन समेत छन् ।
ट्रम्प प्रशासनले विनाभिसा सिमाक्षेत्रमा आएर एसाइलम गर्नेहरुका लागि नीतिमा कडाई गरिरहँदा एमपीपीको कार्यान्वयन गरिएको हो । यो नियमबाट नेपालीहरुभने अहिलेसम्म प्रभावित भएका छैनन् ।
