यी हुन् ट्रम्प प्रशासनबाट अमेरिकामा आउन प्रतिबन्ध लगाइएकाहरु
प्रकाशित मिति : माघ १४, २०७६ मंगलबार
अमेरिकी राष्ट्रपतिमा निर्वाचित भएलगत्तै डोनाल्ड ट्रम्पले विभिन्न देशका नागरिकहरुमाथि विभिन्न प्रकारका भिसा प्रतिबन्धहरु जारी गरे । कार्यकारी आदेशमार्फत यस्ता प्रतिबन्ध लगाएका ट्रम्पले विभिन्न कानुनुी लडाईको सामना गर्नुपरेको थियो ।
सर्बोच्च अदालतले ट्रम्पबाट जारी यात्रा प्रतिबन्धको कार्यान्वयनका लागि बाटो खोलिदिएपछि हौसिएका ट्रम्पले केही नयाँ देशहरुमाथि पनि त्यस्ता प्रतिबन्धहरु लगाएका छन् ।
अमेरिकामा यात्रा गर्न प्रतिबन्ध लगाइएकाहरु
इरान, लिबिया, नर्थ कोरिया, सिरिया र यमनका नागरिकहरुलाई सामान्यतया अमेरिका आउनमा रोक लगाइएको छ । उनीहरुलाई भिजिटर लगायतका गैर आप्रवासी भिसा वा अमेरिकामा विभिन्न श्रेणीको ग्रिनकार्ड फाइल गरेर आप्रवासी भिसामा आउनसमेत प्रतिबन्ध लगाइएको छ ।
इरान, लिबिया र यमनका विद्यार्थीहरुका सन्दर्भमा भने केही अपवाद लागु गरिएको छ । उनीहरु विद्यार्थी भिसामा अमेरिका आउनसक्ने बाटो त खोलिएको छ तर त्यो बाटो निकै साँगुरो छ ।
सुरुमा चाडलाई पनि भिसा प्रतिबन्ध लगाइएको थियो । तर पछि उक्त सुचीबाट भने चाडलाई हटाइयो । सोमालियाका नागरिकलाई पनि अमेरिकामा आप्रवासी भिसामा प्रतिबन्ध लगाइएको छ । तर अमेरिका भ्रमण गर्न आउनका लागि भिजिटर लगायतका गैर आप्रवासी भिसामा भने प्रतिबन्ध लगाइएको छैन ।
भेनेजुएलाका केही सुरक्षा अधिकारीहरुमाथि पनि भिसा प्रतिबन्ध लगाइएको छ ।
अरु कुन कुन देश थपिदै छ ?
ट्रम्प प्रशासनले भिसा प्रतिबन्धको सुचीमा तान्जिनिया, बेलारुस, इरिटेरिया, क्रिगिस्तान, म्यानमार, नाइजेरिया र सुडानलाई थप्ने तयारी गरिरहेको छ । हरेक ६ महिनामा यात्रा प्रतिबन्धबारे पुनरावलोकन गर्ने ट्रम्प प्रशासनको नीति अनुरुप यी देशहरुबारे पुनरावलोकन भइरहेको छ ।
यात्रा प्रतिबन्ध सुरु भएपछि ४२ हजार भिसाका आवेदनहरुलाई अयोग्य सावित गरिसकिएको छ । तर कतिपय भिसाका आवेदनमा भने वेभर समेत जारी गरिएको छ ।