न्युयोर्कमा ल्याइयो गैर नागरिकलाई मताधिकार दिने बिल, पारित गराउन नेपाली समेतको दवाव
प्रकाशित मिति : माघ १०, २०७६ शुक्रबार
न्युयोर्क सिटीभित्रको स्थानीय चुनावमा ग्रिनकार्ड र वर्क परमिट हुनेहरुले समेत मतदान गर्न पाउने अधिकार प्रदान गर्ने विधेयक न्युयोर्क सिटी काउन्सिलमा प्रस्ताव गरिएको छ । यदि उक्त विधेयक पारित भएमा न्युयोर्क सिटीभित्रको महानगरीय चुनावमा ग्रिनकार्ड र वर्कपरमिट हुनेहरुले समेत मतदान गर्न पाउनेछन्, अमेरिकी नागरिकताको जरुरत पर्नेछैन ।
सिटी काउन्सिलम्यान यदानिस रोड्रिगेजले स्पोन्सर गरेको उक्त विधेयक पारित भएमा झण्डै १० लाख गैर अमेरिकी नागरिकले समेत स्थानीय चुनावमा मतदान गर्न पाउनेछन् । रोड्रिगेज डोमेनिक रिपब्लिकबाट अमेरिका आएका आप्रवासी हुन् ।
रोड्रिगेज आफै सन् १९८३ मा ग्रिनकार्डसहित अमेरिका आएका थिए भने सन् २००० मा अमेरिकी नागरिकता लिएका थिए । यो बीचमा उनले डिसवासरदेखि ट्याक्सी चालकसम्मको काम गरेर सिटीलाई ट्याक्स तिरेका थिए तर चुनावी प्रकृयामा सहभागी हुन पाएका थिएनन् ।
यसप्रकारको विधेयक सिटी काउन्सिलमा ल्याइएको यो नै पहिलोपटक भने होइन । सन् २००९ र सन् २०१३ मा पनि यो बिल प्रस्ताव गरिएको थियो । तर यसपटक बिलको कोस्पोन्सर गर्नेमा ३० जना रहेको र ५१ सदस्यीय काउन्सिलमा पहिले नै बहुमत पुगेकाले बिल पारित हुने सम्भावना रहेको छ ।
यदि बिल पारित भएमा र मेयर बिल डे ब्लाजिओले हस्ताक्षर गरेमा सन् २०२१ मा हुने स्थानीय निर्वाचनमा ग्रिनकार्ड वाहक र वर्क परमिट हुनेहरुले पनि मतदान गर्न पाउने अपेक्षा गरिएको छ । आगामी बर्ष न्युयोर्क सिटीमा मेयर, कम्प्ट्रोलर, पब्लिक एड्भोकेट, पाँचवटै बोरोका प्रेसिडेन्ट र काउन्सिलका ५१ मध्ये ३१ सिटका लागि चुनाव हुनेछ ।
विधयेक पारित गराउन दवाव
यसैबीच विधयेक पारित गराउन दवाव दिने उद्देश्यले न्युयोर्क सिटीमा ४५ वटा आप्रवासी अधिकारसम्बन्धि संस्थाले अभियान नै सुरुवात गरेका छन् , जसको नेतृत्व युनाइटेड नेवरहुड हाउसेजले गरेको छ ।
अमेरिकी नागरिकता नहुनेले समेत न्युयोर्क सिटीको स्थानीय चुनावमा मतदान गर्न पाउने अधिकारसहितको बिल पारित गराउन आयोजित दवावमुलक कार्यक्रममा नेपालीहरुको समेत उपस्थीति रहेको थियो ।
न्युयोर्क आप्रवासन गठबन्धनका कार्यकारी निर्देशक स्टीभ चोइले न्युयोर्कमा कानुनी हिसावले बसोबास गरिरहेका झण्डै १० लाख आप्रवासीहरु स्थानीय चुनावमा मतदानको अधिकारबाट वञ्चित भएको बताउँदै उनीहरुलाई समेत मताधिकार प्रदान गरेर न्युयोर्कमा २१ औं शताब्दीको समावेशी प्रजातान्त्रिक अभ्यास गरिनुपर्ने बताए ।
युनाइटेड नेवरहुड हाउसेजका कार्यकारी निर्देशक सुसान स्टैमलरले आप्रवासीको समावेशीता र सशक्तिकणको प्रवद्र्धनमा न्युयोर्क सिटीले मुलुककै नेतृत्व गर्ने भएपनि कैयन न्युयोर्कबासीहरुलाई आफ्नो प्रतिनिधित्व गर्ने अधिकारीहरु र परिवार तथा समुदायमा प्रभाव पार्ने नीतिमा भनाई राख्न पाउने अधिकार नभएकाले मतदानको अधिकार प्रदान गरिनुपर्ने बताए ।
त्यस्तै अधिकारकर्मी शैलेश श्रेष्ठले नेपाली भाषी समुदाय न्युयोर्कमा उदयमान अल्पसंख्यक भएको तर झण्डै ५० हजार न्युयोर्क बासी नेपालीहरुमध्ये ५ प्रतिशतमा पनि मतदानको अधिकार नरहेको बताए । यदि बिल पारित भएमा बहुसंख्यक नेपालीहरु प्रजातान्त्रिक प्रकृयामा सहभागी हुन योग्य हुने श्रेष्ठले बताए ।